Tok i Tru Long Hel
LAIN i save bosim bilip bilong Sios Bilong Inglan i kamapim wanpela ripot i tok, hel em i no wanpela hatpela ples i gat paia, nogat; em wanpela ples nating yumi no ken save long en. Ripot i tok: “I gat planti as na ol i senisim dispela bilip. Tasol wanpela as em olsem, ol man i gat bilip Kristen na ol man i no gat bilip Kristen ol i tok strong olsem lotu i no ken pretim man, na planti bilong ol i ting dispela tok olsem God i orait long planti milion man i kisim pen i stap oltaim, em i narakain tru long pasin sori God i kamapim long rot bilong Krais.”
I no ol man bilong Sios Bilong Inglan tasol ol i no amamas tumas long dispela bilip bilong bipo long hel. Ol man bilong ol narapela narapela lotu i hatwok long lotu long wanpela God em i gat hatpela pasin na i save kukim ol sinman long paia. Jackson Carroll, em i stap long wanpela yunivesiti (Duke University’s Divinity School) na em i wanpela saveman bilong lotu na bilong sindaun bilong ol man, em i tok: “Ol man i laikim wanpela God i gat pasin sori na i olsem ol i ken holim em.” “Long taim bilong yumi ol man i no laik toktok long sin na rong.”
Long bipo yet ol Witnes Bilong Jehova i bilip olsem, hel em i ples bilong ol man i dai pinis, em matmat, olsem Baibel i tok, na em i no wanpela ples bilong kisim pen nogut na i gat paia long en. Ol i no bilip olsem, long wanem, planti man i laikim dispela bilip, nogat; ol i bilip olsem, long wanem, Baibel yet i tok: “Ol man i dai pinis, ol i no inap save long wanpela samting. . . . Yu no inap mekim wok o tingting o kisim gutpela tingting na save long ples bilong ol man i dai pinis [“hel,” Katolik Douay Version].”—Saveman 9:5, 10.
Dispela stretpela save long ol man i dai pinis i stap olsem wanem i helpim namba wan presiden bilong Sosaiti Was Taua, em Charles Taze Russell long raitim tok olsem long 1896: “Mipela i no painim kain tok [long Baibel] olsem i gat ples bilong kisim pen oltaim olsem ol bilip bilong ol misin na ol buk singsing bilong lotu na ol man bilong autim tok i save skulim kranki ol man long en. Tasol mipela i painim wanpela ‘hel,’ sheol, hades, em ples olgeta lain bai i go long en, long wanem, yumi kisim sin long Adam, na long dispela ples Bikpela i kisim bek yumi long rot bilong indai bilong em; na dispela hel i makim matmat—man i dai na i no inap mekim wanpela samting.”
Olsem na winim 100 yia nau, ol Witnes Bilong Jehova i bin skulim ol man long tok i tru bilong Baibel long hel.
[Piksa long pes 32]
Charles T. Russell