Husat i Bosim Graun?

“HUSAT i bosim dispela graun?” Sapos wanpela man i givim dispela askim long yu, yu bai bekim olsem wanem? Planti man bilong lotu bai tok “God” o “Jisas.” Wanpela stori i kamap long wanpela niuspepa bilong ol ailan Bahama (The Freeport News), i givim wanpela bekim em wan wan man tasol bai ting ol inap givim.

Meri i raitim dispela stori i tok: “Mi painim wanpela liklik nius long lata bilong haus bilong mi. Planti taim mi no laik kaunim ol kain pepa olsem, tasol long dispela taim mi kaunim dispela liklik nius. Het-tok i kamapim askim olsem: ‘Husat Tru i Bosim Dispela Graun?’ ” Taim dispela meri i kaunim dispela liklik nius em Baibel i as bilong en em i kisim save olsem man i bosim dispela graun em i no God o Jisas, tasol em i Satan.​—⁠Jon 12:31; 14:30; 16:11; 1 Jon 5:⁠19.

Liklik nius i tok: “Ol i mekim ol narapela kain pasin i nogut moa yet. Ol i bin pasim ol man insait long rum na pulimapim ges nogut long rum na ol i dai; ol i kalabusim ol man long ol traipela banis kalabus nogut; ol i tromoi ol kain kain bom nogut i save kukim skin bilong man, na ol i mekim ol narapela samting nogut tru bilong givim bikpela pen long ol man na bagarapim ol. . . . Wanpela samting i save kirapim ol man long mekim ol kain pasin nogut tru olsem? Yu ting i gat wanpela spirit nogut i stap na em i gat strong long kirapim ol man long bagarapim nogut tru ol narapela man?” Yu ting yumi ken kirap nogut, long wanem, Baibel i kolim Satan olsem “giaman god bilong dispela graun”?​—⁠2 Korin 4:⁠4.

Gutpela tru, klostu nau Satan na ol spirit nogut bilong em bai i no stap moa. “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:17) Yes, Baibel i tok promis olsem ol man i save mekim laik bilong God ol i ken i stap oltaim long nupela graun i gat stretpela pasin long en. (Song 37:​9-11; 2 Pita 3:13; KTH 21:⁠3, 4) Bai yumi amamas tru taim tingting na wok nogut bilong Satan na ol spirit nogut i pinis olgeta!

Taim em i kamapim pinis ol bikpela tok bilong liklik nius, meri i save raitim ol stori long niuspepa (The Freeport News) i pinisim tok olsem: “Mi amamas tru mi kaunim dispela liklik nius . . . long wanem, mi tu i bin tingting planti long ol samting i kamap long graun, na husat i bosim.”