Daunim Ol Tok Giaman Long Frans
I NO longtaim i go pinis na ol man i bin sutim planti tok giaman long ol Witnes Bilong Jehova long Frans. Ol nius na TV samting i mekim wok long sampela stori nogut bilong ol lotu i bihainim man long Yurop na long Japan, na ol i kamapim kain kain tok giaman long ol Witnes. Ol i giaman na tok ol Witnes i wanpela lotu i bihainim man, na ol i bikpela lain na moa nogut, winim planti narapela lotu olsem.
Bilong stretim dispela samting, ol Witnes Bilong Jehova i kamapim wanpela liklik nius i bekim ol kain askim olsem: Ol Witnes Bilong Jehova ol i husat? Ol i Kristen? Ol i save kisim helpim long dokta samting? Bilong wanem ol i save autim tok long ol haus? Ol i kisim we mani bilong mekim wok bilong ol? Ol Witnes Bilong Jehova i mekim wanem bilong helpim ol man long hap bilong ol?
Nem bilong dispela liklik nius ol i wokim long tok Frans i olsem Ol Witnes Bilong Jehova—Ol Samting Yu Mas Save Long En. Ol i laik bai planti manmeri tru i kisim dispela liklik nius, olsem na ol i stretim rot bilong mekim bikpela wok bilong tilim long ol man. Kirap long Me 13 na i go inap long Jun 9, 1996, ol i bin tilim 9 milion samting bilong ol dispela nius.
Planti man, na sampela bikman bilong gavman tu, ol i laikim dispela liklik nius. Taim wanpela kaunsil bilong provins i kaunim pinis dispela liklik nius, em i raitim pas na i tok olsem: “Mi kros tru long ol man i sutim tok long ol Witnes Bilong Jehova. Planti taim mi bin pilim tru ol wok yupela i mekim, em yupela i no tingim yupela yet tasol na yupela i laik helpim ol man.” Na taim wanpela memba bilong lain Yuropian Palamen em i kaunim pinis dispela liklik nius, em i raitim pas na i tok: “Klostu olgeta manmeri inap skelim gut na save olsem lain Kristen yupela i insait long en i narapela, na ol lotu i bihainim man ol i narapela.”
Long Britani, wanpela Witnes i givim dispela liklik nius long wanpela pris na em i amamas long kisim. Pris i tok: “Mi laik tok amamas long wok yu mekim.” Na em i tok moa: “Mi save tokim lain bilong mi ol i mas larim yupela i kam insait long haus bilong ol na givim kopi long yupela. Na yu ken tokim ol manmeri yu bungim olsem yu bin kam long haus bilong mi. Mi laik tokim yupela tu olsem mi save amamas long kaunim ol buk na nius bilong yupela.”
Taim wanpela Talatala bilong Alsas i kisim pinis dispela liklik nius, em i salim pas long Sosaiti Was Taua na toksave olsem em i laik stadi long Baibel. Em i tok: ‘Mi no bilip moa long lotu bilong mi. Mi laik kirap gen long lainim ol samting bilong spirit.’ Maski ol man i sutim ol tok giaman long ol, ol Witnes Bilong Jehova long Frans—na long olgeta hap bilong graun—i wok yet long helpim ol man long kisim stretpela save long laik bilong God, olsem i stap long Baibel.—2 Timoti 3:16, 17.