Taim Ol Witnes Bilong Jehova i Kam Lukim Yu

Ol Katolik i mas mekim wanem sapos wanpela Witnes Bilong Jehova i kam lukim ol long haus bilong ol? Wanpela buk em nau tasol wanpela lain i bin wokim (National Catechistic Bureau of the Italian Bishops’ Conference), em i tok: “Long gutpela pasin tokim ol yu no laik toktok wantaim ol, na yu mas strong long tok olsem, tasol i no olsem yu no mekim gutpela pasin.”

I no olgeta Katolik i wanbel long dispela tok. Wanpela man i stap long Foja, Itali, i salim pas long wanpela nius ol i save wokim long olgeta wan wan de (Gazzetta del Mezzogiorno) na em i tok:

“Mi no wanpela Witnes Bilong Jehova. Mi wanpela Katolik. Tasol mi kirap nogut long sampela lo em lotu i kamapim bilong tokim ol lain bilong misin long putim toksave long dua bilong ol bilong rausim ol Witnes Bilong Jehova i go. Ol Witnes i save karim Tok Bilong God raun, na ol i helpim ol narapela long kisim sampela save moa long Baibel. Dispela i mekim na mi tingim gen taim sik kolora i bin kamap long Itali, na ol i givim tok long mipela long ol samting mipela i ken mekim na bai dispela sik i no ken kisim mipela.

“Mi yet mi ting, dispela i soim olsem misin i kamapim ol lo bilong em yet na em i no kisim tingting bilong ol lain bilong misin. Tasol inap sampela yia nau mi bin lukim ol Katolik tu i wok long go long haus bilong ol man, na ol i go long haus bilong ol Witnes Bilong Jehova tu; na ol Witnes i larim ol i go insait, na ol i toktok wantaim ol​—⁠ol Witnes i no rausim ol.”

Ol Witnes Bilong Jehova i no save subim ol man long harim tok bilong ol. Tasol ol i wok strong long tokim ol man long wetim gutpela samting bai kamap long bihain, em Baibel i tok promis long en​—⁠em dispela samting i bin mekim gut bel bilong ol yet long dispela taim bilong hevi. Taim ol Witnes Bilong Jehova i go long haus bilong ol man, na taim ol i bungim ol man long rot, ol i save autim gutnius bilong Kingdom bilong God long ol man i laik harim dispela tok.​—⁠Matyu 24:14; Aposel 5:42; 17:⁠17.