“Ol Nius Bilong Tok i Tru i Olsem Gutpela Ston i Dia Tumas”

“Ol nius bilong tok i tru i olsem gutpela ston i dia tumas.” Pas wanpela man i salim i go long brens-ofis bilong ol Witnes Bilong Jehova long Naijiria i stori olsem long tupela bikpela nius. Man i raitim dispela pas em wanpela yangpela man, na em i stori olsem:

“Mi raitim dispela pas bilong tok tenkyu long hatwok yupela i mekim bilong kamapim ol gutpela tok long nius Wastaua na Kirap! i stori long ol samting i save painim yumi long olgeta wan wan de.

“Mi gat 17 krismas. Long yia i go pinis, wanpela redio-stesin long hia i kamapim wanpela resis bilong raitim stori long ‘Pasin Bilong Laikim Tru Narapela i No Save Kamap Long Rot Bilong Maritpasin Tasol​—⁠Sik AIDS i Stap Tru.’ Ol wan wan stori i mas i gat olsem 400 tok. Man i raitim gutpela stori tru bai ol i givim 1,000 naira (K16.75) long em. Tasol ol i tok, ol man i mas raitim dispela stori bilong lain long ol samting, na i no bilong winim prais tasol. . . .

“Mi lukim ol stori bilong sik AIDS long tupela nius wantaim. Long pasin bilong laikim narapela, i gat planti stori bilong en i stap long ol dispela nius. Mi mekim wok long ol tok i stap long Kirap! bilong Jun 8, 1979.

“Inap tupela mun bihain tasol long taim mi salim stori bilong mi i go, ol i putim toksave long husat i win. Mi kirap nogut long mi kisim namba wan prais long taun Kros Riva na Akwa Ibom!

“Olgeta tok mi kisim bilong raitim stori i kam long dispela tupela nius. Em i gutpela samting tru olsem Jehova i save helpim yumi long ol gutpela tok long taim stret bilong en long dispela taim nogut i gat planti hevi. Yumi ol Kristen tru yumi save, pasin bilong laikim tru narapela i no save kamap long rot bilong maritpasin tasol. Na tru tumas, pasin bilong stap klin na bihainim stretpela pasin i lukautim yumi na yumi no kisim ol sik olsem AIDS.

“Mi laik tenkyu gen long ol dispela gutpela nius bilong tok i tru i olsem gutpela ston i dia tumas em yupela i save wokim long olgeta taim. Jehova i ken blesim yet hatwok bilong yupela taim yupela i wokim yet ol dispela nius i gutpela tru.”