Nambawan Kot Bilong Konektikat i Helpim Laik Bilong Sikman
Long Epril 8, 1996, Nambawan Kot Bilong Konektikat long Yunaitet Stets i helpim laik bilong ol Witnes Bilong Jehova long sakim blut. Dispela tok Nambawan Kot i pasim i senisim tok narapela kot long bipo i bin pasim.
Long Ogas 1994, Nelly Vega, em wanpela Witnes Bilong Jehova, em i lusim planti blut taim em i karim namba wan pikinini bilong em. Ol i wok strong long pasim blut, tasol ol i no inap. Misis Vega i lusim planti blut moa, olsem na haus sik i laik kisim tok orait long kot long givim blut long em. Misis Vega i raitim pinis pepa i toksave long ol i no ken givim blut long em o ol marasin i gat blut taim em i stap long haus sik, na sapos sampela samting i painim em long dispela laik bilong em, haus sik bai i no gat asua long dispela samting. Tasol haus sik i tok pait olsem ol i mas subim mama long kisim blut, long wanem, ol i tingim nupela pikinini, na ol i tok, em i mas i gat mama. Kot tu i tingim olsem, maski planti blut i lus, Misis Vega i yangpela meri na em i no gat sik. Olsem na Kot i givim tok orait long haus sik na ol i givim blut long Misis Vega, maski man bilong em na loya bilong ol i tok strong long em i no ken kisim blut.
Bihain ol i kisim kot bilong em i go long Nambawan Kot Bilong Konektikat. Long dispela kot, ol i pasim tok olsem samting haus sik i mekim i sakim laik bilong Misis Vega. Tok Nambawan Kot i pasim i tok olsem: “Kot bilong pastaim i wokim kot bilong dispela samting long biknait, long taim ol i mas skelim hariap ol samting ol bai mekim, olsem na olgeta i no inap long kamapim gut tingting bilong ol long dispela kot.”
Tok Nambawan Kot Bilong Konektikat i pasim i gutpela bilong helpim ol Witnes Bilong Jehova na ol narapela man tu. Donald T. Ridley, em loya bilong Misis Vega, em i tok: “Em i bikpela samting long ol man i gat sik em ol i no orait long tingting bilong dokta bilong ol long samting em i laik mekim. Tok kot i pasim bai lukautim ol sikman na haus sik i no ken subim sikman na daunim bilip bilong em, maski bilip bilong sikman em i samting bilong lotu o samting bilong graun.”