Lam Bilong Soim Rot Long Yu
“BIKPELA, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Long dispela tok, profet Jeremaia i kamapim klia olsem yumi man yet i no inap bosim gut wokabaut bilong yumi; narapela man i mas helpim yumi. Yumi inap painim kain helpim olsem long we? Man bilong raitim Song i bekim dispela askim long beten bilong em long God Jehova: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”—Song 119:105.
Ol man i stadi long Tok Bilong God, em Baibel Holi, na bihainim ol tok em i kamapim, ol i olsem wanpela man i kirap long bikmoning yet na wokabaut i go long wanpela hap. Pastaim em i no inap lukim ol samting, long wanem, ples i tudak. Tasol taim san i kam antap, em i wok long lukim klia ol samting. Nau san i lait stret antap long het bilong en, na em inap lukim gut olgeta samting. Kain tok piksa olsem i mekim na yumi inap tingim wanpela savetok bilong Baibel, olsem: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.”—Sindaun 4:18.
Olsem wanem long ol man i sakim tok bilong God bilong soim rot long ol? Baibel i tok: “Rot bilong ol man nogut i tudak olsem biknait. Ol i save pundaun na ol i no save wanem samting i sutim lek bilong ol.” (Sindaun 4:18) Tru tumas, man nogut i olsem man i wokabaut long tudak na wanpela samting i sutim lek bilong em. Maski i olsem ol wok bilong ol i kamap gutpela, tasol em i bilong liklik taim tasol, long wanem, “maski yu gat gutpela tingting na gutpela save na yu save long gutpela pasin bilong mekim ol samting, dispela i no inap helpim yu liklik, sapos yu birua long Bikpela.”—Sindaun 21:30.
Olsem na yu mas larim Tok Bilong God, em Baibel, i soim rot long yu. Sapos yu mekim olsem, bai yu lukim tok bilong Sindaun 3:5, 6 i kamap tru: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”