Tenpela Lo

BISOP bilong Glosta long Inglan i kisim save olsem planti pris pasto long dispela ples em i lukautim ol i no inap kolim Tenpela Lo, na 10 pesen bilong ol dispela pris pasto i no save ol inap painim we ol dispela lo long Baibel. Tasol dispela samting i bin kamap long 450 yia bipo. Olsem wanem? Ol i save gut long ol dispela lo long nau? Wanpela nius (Sunday Times) i skelim dispela samting long ol pris pasto bilong lotu Angliken na nius i kamapim klia olsem ol i no bin senis liklik, nogat tru.

Ol i toktok wantaim 200 pris pasto na namel long ol, 34 pesen tasol inap kolim olgeta Tenpela Lo. Na namel long ol narapela bilong dispela 200 pris pasto, wanpela i pilim olsem ol Tenpela Lo i gat planti tambu tumas, na narapela i no laikim ol dispela lo, long wanem, em i ting ol i no inap helpim ol lain bilong nau long winim ol hevi bilong bihainim stretpela pasin.

Olsem wanem long yu? Yu save long Tenpela Lo? Yu save ol i stap we long Baibel? Ol i stap long Kisim Bek, em namba tu buk bilong Baibel, na ol i stap long ves 1 i go inap long ves 17 bilong sapta 20. Yu mas kaunim ol dispela Lo. I gat wanpela rot i no hatwok tumas long bungim ol i go narapela narapela. Olsem: Ol 4-pela i stap paslain i kolim ol samting yumi mas mekim bilong lotu long God, namba 5 i stori long sindaun bilong famili, namba 6 i go inap namba 9 i stori long i stap bilong yumi wantaim ol narapela, na namba 10 i narapela kain tru​—⁠em i kirapim yumi long skelim bel bilong yumi, na skelim ol pasin bilong yumi. Orait nau yumi ken stori liklik long olsem wanem ol Kristen inap bihainim as bilong dispela Tenpela Lo.

Namba 1: Yu mas lotu long God wanpela tasol. Namba 2: No ken mekim wok long ol imis bilong lotuim God. Namba 3: Long olgeta taim yu mas mekim gut long nem bilong God. Namba 4: Mas i gat taim bilong tingim ol samting bilong spirit, na no ken larim ol narapela samting i pulim dispela hap taim. Namba 5: Ol pikinini, yupela i mas daun long papamama bilong yupela. Namba 6: No ken kilim man i dai. Namba 7: No ken mekim pasin pamuk. Namba 8: No ken stil. Namba 9: Yu mas tok tru tasol. Namba 10: No ken mangal.

Dispela Tenpela Lo em hap bilong ol lo em God i givim long Moses. Tasol as bilong dispela Lo i bilong stap oltaim. (Rom 6:14; Kolosi 2:13; 14) Long dispela as ol disaipel bilong Jisas i kisim ol tok bilong Tenpela Lo na i stori long en. (Rom 13:​8-10) Sapos long nau olgeta manmeri i tingim na bihainim as bilong dispela Lo em God yet i bin kirapim ol man long raitim, bai yumi stap amamas na stap gut tru!