Ol i Bilasim Skin Long Gutpela Bilas Gol

LONG bipo yet na i kam inap nau, ol man i save tingim ol gutpela bilas gol bilong bilasim skin em i samting tru, long wanem, i gat bikpela pe bilong en na i naispela samting tru. Taim Josep i kamap praim-minista long Isip, King i givim wanpela sen gol long em bilong putim long nek. (Stat 41:42) Wanpela wokboi i bin givim Rebeka tupela paspas gol na wanpela ring gol bilong bilasim nus; pe bilong en long nau i olsem 1,400 dola. (Stat 24:22) Yumi ken ting olsem ol i tenkyu long ol dispela gutpela presen ol i bin kisim na ol i amamas long pasim ol dispela bilas long skin bilong ol.

Baibel i tok piksa long wanpela gutpela bilas i winim tru ol gutpela bilas Josep na Rebeka i bin pasim. Sindaun 25:12 i tok: “Sapos man i gat gutpela tingting, em i stretim wantok bilong en, na sapos dispela wantok i ting dispela tok i gutpela tru, orait i olsem wantok i kisim gutpela bilas gol.” Taim man i givim tok long narapela bilong stretim em, na Baibel i as bilong dispela tok, em i save givim wanpela gutpela presen tru long em. Bilong wanem i olsem? Long wanem, dispela gutpela tok bilong stretim man em i kam long Jehova yet. Baibel i tok: “Pikinini, sapos Bikpela i mekim wanpela samting long yu bilong stretim yu, yu no ken kros na bel nogut. Long wanem, Bikpela i save stretim ol man em i laikim tumas, olsem ol papa i save stretim ol pikinini ol i laikim tumas.” (Sindaun 3:​11, 12) Sapos long pasin daun man i kisim dispela tok bilong stretim em na em i bihainim, i olsem em i bilasim skin bilong em long gutpela bilas gol. Dispela em i wankain olsem wanpela savetok bilong Baibel, em i tok: “Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol.”​—⁠Sindaun 3:​13, 14.