“Yupela Mas i Go na Mekim Ol Manmeri Bilong Olgeta Lain i Kamap Disaipel”
“OLSEM na yupela mas i go na mekim ol manmeri bilong olgeta lain i kamap disaipel bilong mi. Na yupela mas baptaisim ol long nem bilong Papa na bilong Pikinini na bilong spirit holi.” Dispela tok bilong Jisas i stap long Matyu 28:19, ol i tanim olsem long Baibel New World Translation. Tasol sampela lain i bin sutim tok long dispela tok ol i tanim. Wanpela liklik nius bilong lotu i tok: “I gat wanpela pasin tasol bilong tanim na i stret wantaim Baibel long tok Grik, olsem: ‘Mekim olgeta lain i kamap disaipel! ’ ” Olsem wanem? Dispela tok bilong ol i stret?
Dispela tok, “Mekim olgeta lain i kamap disaipel” em i stap long planti narapela Baibel na ol i bin raitim wankain stret olsem long Baibel Grik. Orait, i gat wanem as na i gat kain tok olsem, “Mekim ol manmeri bilong olgeta lain i kamap disaipel, na yupela mas baptaisim ol”? Em ol tok i stap klostu. Dispela tok “baptaisim ol” i makim klia tru ol man wan wan na i no makim wanpela lain. Wanpela saveman bilong Jemani, em Hans Bruns, em i tok: “Dispela [tok] ‘ol’ i no makim ol lain manmeri (long Baibel Grik dispela tok i klia), nogat. Em i makim ol manmeri i stap insait long ol dispela lain.”
Na tu, yumi ken skelim wok ol i bin mekim bilong bihainim dispela tok Jisas i bin givim long ol. Long stori bilong wok misineri bilong Pol na Barnabas long Derbe, em wanpela taun long Esia Maina, yumi kaunim olsem: “Tupela i autim gutnius long Derbe, na tupela i mekim planti manmeri i kamap disaipel. Na bihain tupela i go bek long Listra na Aikoniam na Antiok.” (Aposel 14:21) Tingim olsem, Pol na Barnabas i helpim sampela manmeri long kamap disaipel long taun Derbe—i no olgeta manmeri long dispela taun.
Olsem tasol, taim Buk Kamapim Tok Hait i tok profet long dispela taim bilong pinis, em i tok, “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples” bai i lotuim God, na em i no tok olsem olgeta lain manmeri bai lotuim God, nogat. (KTH 7:9) Olsem na yumi inap bilip tru olsem Baibel New World Translation i kamapim stret ol tok bilong ‘Buk bilong God, em spirit bilong God yet i bin kamapim.’—2 Timoti 3:16.