Wanpela Bekim i Kirapim Tingting Bilong Man

I NO longtaim i go pinis wanpela nius, Catholic Herald, bilong ol Katolik bilong Briten, i kamapim stori bilong pas bilong wanpela man i save kaunim dispela nius long Wels. Pas i tok olsem: “Wanpela nait tupela Witnes Bilong Jehova i kam long haus bilong mi. Mi kirap na tokim ol olsem, ‘Misin Katolik yet i bin tokaut strong olsem ol tok bilong Nupela Testament​—⁠em hap tok bilong en yupela i kolim​—⁠em i stret na yumi inap bilip long en.’ Mi kirap nogut taim wanpela bilong ol i wanbel long dispela tok. Em i tok ‘yes, yupela i bin tokaut olsem, tasol yupela i no save bihainim tok bilong en. Jisas i tok, “Yupela wan wan i mas laikim tru ol arapela,” tasol yupela i save kilim i dai narapela narapela. Long ol pait i bin kamap bipo, ol Katolik i bin kilim i dai ol Katolik, tasol i no gat wanpela Witnes Bilong Jehova i bin kilim i dai wanpela [wanbilip] Witnes.’ Mi wanbel long tok bilong em. Olsem wanem yumi ken beten bilong kamap wanbel wantaim ‘ol brata i bruk long yumi’ sapos yumi yet i no gat pasin wanbel tru tru i stap namel long yumi? Pastaim yumi mas lusim dispela pasin bilong kilim i dai ol narapela.”​—⁠Jon 15:⁠12.

Tupela bikpela pait i bin kamap long taim bilong yumi i bin kirap insait long ol kantri i holim nating nem Kristen, na ol dispela pait i bin kilim i dai olsem 50 milion i go inap 60 milion manmeri. Yumi ken tok tru olsem, ol Witnes Bilong Jehova i no insait long ol dispela pait, na ol i no insait long wanpela bilong ol dispela pait i wok long kamap long nau. Olsem wanem na ol i no insait long ol dispela samting? Sapos yu kisim save moa long pasin Kristen bilong laikim tru ol narapela na pasin wanbel em i stap namel long 5 milion Witnes Bilong Jehova i stap long olgeta hap bilong graun, dispela bai helpim yu tru.​—⁠Skelim wantaim Aisaia 2:⁠4.

[Piksa Kredit Lain long pes 32]

U.S. National Archives photo