Ol i Save Litimapim Nem Bilong Man Bilong Wokim Ol

TAIM san i go daun na i kamapim kala long ol samting, em i naispela tru. Tasol taim yu lukim san i go daun baksait long wanpela maunten bilong ol maunten Alp Apuan long Taskani, Itali, em i narakain na i naispela moa yet.

Taim yu stap longwe na lukluk, bai yu lukim olsem san i go daun insait long maunten na em i no i go daun long baksait bilong maunten. Bilong wanem ol i lukim san i mekim olsem? Long wanem, long het bilong maunten i gat raunpela hul kain olsem dua ol i bin katim insait long maunten na i gat hap antap long en olsem raunpela rup. Olsem na dispela maunten i sap tru em i kisim nem olsem Monte Forato​—⁠Maunten i Gat Hul. Graun i save tanim tanim na raunim san, olsem na taim san i go daun baksait long maunten, i olsem em i go insait long dispela hul, na san i mekim olsem inap tupela taim tasol long ol wan wan yia na ol man i save lukim.

Olsem ol narapela samting God i wokim, skai i save givim biknem long Man bilong wokim olgeta samting, maski skai i no gat laip. Olsem wanem skai i mekim olsem? Em i wankain olsem wanpela naispela piksa i givim biknem long man i wokim. Olsem tasol, ol samting long antap i save tokaut long strong bilong Jehova, na save bilong em, na biknem bilong em. Olsem man bilong raitim Song i tok: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em.” (Song 19:1; 69:34) San na ol narapela samting i no gat laip i save litimapim nem bilong Man bilong wokim ol. Na olsem wanem long yumi? Yumi mas litimapim nem bilong Em moa yet!​—⁠Song 148:​1, 3, 12, 13.