Yu Ting God Bai Bagarapim Graun?
POP John Paul Namba 2 i tok, ol manmeri inap strongim bel na wetim gutpela samting bai kamap long bihain. Em i tok, long bipo yet na i kam inap long nau, “ol man i mekim yet ol sin, na ating ol dispela sin i bikpela moa yet, winim sin ol man i bin mekim paslain long bikpela tait.” Tasol pop i tok, “long kontrak God i mekim wantaim Noa, nau yumi save olsem i no gat wanpela sin inap mekim na God bai bagarapim dispela graun em yet i bin wokim.”
Yu ting tru God bai i no inap bagarapim graun? Baibel i tok bihain long Bikpela Tait, God i tokim Noa: “Mi promis bai mi no ken salim gen bikpela tait i kam na bagarapim olgeta samting i gat laip. Na tait bai i no ken karamapim gen olgeta hap bilong dispela graun.” (Stat 9:11) Pop i tok, taim God i mekim dispela tok, em i “tok promis long lukautim [graun] na bai i no ken bagarap.”
Baibel i tok klia olsem Man bilong wokim olgeta samting i no inap larim graun i bagarap. Baibel i tok: “Graun i no save senis. Oltaim em i stap olsem tasol.” (Saveman 1:4) Tasol dispela Bikpela Tait i lainim yumi long sampela samting moa—em samting pop i no toktok long en.
Jisas i tok olsem pasin ol man bai mekim long graun long taim em i kam i stap bai i wankain olsem “pasin ol i bin mekim long taim bilong Noa,” long dispela taim ol manmeri “i no [ting] dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.” (Matyu 24:37-39) Aposel Pita tu i tok olsem “bikpela tait i karamapim dispela graun, na graun i bagarap olgeta,” na olsem tasol “graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.”—2 Pita 3:5-7.
Olsem wanem? Jisas na Pita i lusim tingting long kontrak God i mekim wantaim Noa? Nogat tru! Olsem God i bin tok long kontrak em i bin mekim wantaim Noa, em bai no inap kamapim tait wara bilong pinisim ol pasin nogut bilong graun. Tasol em bai mekim wok long strong bilong “King bilong olgeta king, na Bikpela bilong olgeta bikman,” em Krais Jisas. (KTH 19:11-21) Olsem Baibel i tok, God bai no inap bagarapim graun, tasol em bai bagarapim ol man bilong dispela graun i save mekim pasin nogut. (Sindaun 2:21, 22; KTH 11:18) Na bihain “ol stretpela man bai i kisim graun God i givim ol, na bai ol i stap oltaim long en.”—Song 37:29.