Ol i Litimapim Gutpela Pasin Ol Witnes i Mekim

WANPELA nius bilong Itali (La Gazzetta del Mezzogiorno) i tok amamas long ol Witnes Bilong Jehova long kamapim stori “Matera​—⁠City of Unique Cave Dwellings.” Dispela stori i kamap long nius Kirap! (tok Inglis), bilong Julai 8, 1997, na ol i tanim dispela nius long planti tok ples. Long nau ol i tanim Kirap! long 81 tok ples na ol i save wokim 19 milion na tilim long olgeta hap. Dispela nius i tok Kirap! bilong mun Julai i win tru “taim em i kamapim stori bilong ol samting i bin kamap bipo tru long biktaun [Matera] na i gat piksa bilong ol olpela haus samting bilong dispela biktaun em ol i stap yet.”

Dispela nius i litimapim nem bilong ol Witnes taim em i stori long “Bilip Long Tok Bilong God” Kibung Distrik ol i mekim long Matera long 1997. Dispela stori long dispela nius i tok ol Witnes i wok strong na ‘4,000 manmeri ol i go long stediam (XXI Settembre Stadium) bilong taun long mun bilong bikpela san tru; ol i mekim wok bilong klinim ol samting, penim gen ol samting, na ol i stretim ol samting long dispela ples bilong pilai spot (wanpela bikpela wok ol i mekim em bilong stretim ol toilet) na ol i no mekim bilong kisim mani, ol i tromoi mani bilong ol yet long baim ol samting bilong stretim dispela ples bung.’

Ol Witnes Bilong Jehova i wok strong long stap gut wantaim ol man i sindaun klostu long ol. (Matyu 22:​37-39) Na tu, ol i bihainim tok bilong Baibel olsem: “Yupela i mas wokabaut stret namel long ol haiden. Na . . . bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.”​—⁠1 Pita 2:​12.