Ripot Long Wok Bilong Kingdom
Long Pasin Daun Bihainim Rot Jehova i Makim
“YUPELA ol manmeri i no save bikhet na sakim tok bilong Bikpela, yupela i mas i kam long em.” Profet Hibru em Sefanaia, em i mekim dispela singaut inap 2,600 yia bipo, na dispela singaut i go yet long ol manmeri bilong olgeta hap long nau. (Sefanaia 2:3) Wanem insait bilong dispela tok olsem yumi mas i kam long Jehova? Bilong kam long Jehova, man i mas kisim save long dispela God i gat laip, em Jehova, em wanpela tasol em i God tru.—Jeremaia 10:10; Jon 17:3.
Tasol pasin bilong kisim save tasol i no inap mekim na God i orait long man. Bilong God i ken orait long man, em i mas mekim wok long ol dispela save. Olsem wanem em i ken mekim olsem? Long pasin daun man i mas senisim tingting na pasin bilong em na bai i stret wantaim ol lo bilong God, olsem stori i kam long Surinam na i stap daunbilo i kamapim.—Efesus 4:22-24.
Eddy, em wanpela tisa bilong skul na em i gat 35 krismas samting, inap longtaim em i wok long painim ol gutpela bekim bilong ol askim bilong em, olsem: ‘Lotu i gat wanem wok long sindaun bilong ol man long nau?’ na ‘Tok bilong dispela buk bilong bipo, em Baibel, em i stret wantaim tok bilong saiens long nau?’ Taim ol Witnes Bilong Jehova i kam na ol i kamapim ol tok bilong Baibel bilong bekim ol dispela askim bilong em, Eddy i putim gut yau. Em i raitim tu ol tok ol Witnes i kamapim na bai em i ken skelim na save olsem dispela tok i stret o nogat.
Bipo Eddy i bin i go long wanpela lotu em ol i save skulim ol man olsem God i bin wok long senisim skin bilong ol monki na i go i go na long dispela rot ol man i kamap. Olsem na taim ol Witnes i soim em buk Life—How Did It Get Here? By Evolution or by Creation? em i kisim. Buk i kamapim long ples klia tok bilong Baibel long God i bin wokim olgeta samting, na em i pilim tru dispela tok. Taim em i stadi long Baibel, em i bilip olsem em i painim pinis tok i tru!
Tasol nau wanpela traim i painim em. Eddy i save sindaun long wanpela haus em ol man i stap long en i save stil na giaman. Nau em i mas makim wanem rot bai em i bihainim: Bai em i bihainim pasin nogut bilong ol man i save sindaun wantaim em o givim baksait long dispela pasin na bihainim pasin i save litimapim nem bilong God. Eddy i bihainim gutpela tingting tru na em i makim namba tu rot. Em i lusim olgeta poroman nogut na em i lusim dispela haus.—1 Korin 15:33, 34.
Taim Eddy i kirap long go long ol miting long Haus Kingdom em i wok long kamap strong hariap. Em i senisim tu pasin bilong em long bilasim skin na em i kirap long toktok long ol pren na famili bilong em long ol samting em i wok long lainim. Bihain amamas bilong em i go bikpela taim ol elda i orait long em i ken autim “gutnius” long ol manmeri. (Matyu 24:14; Aposel 20:20) Long Disemba 1996, dispela de em i bin wet long en i kamap pinis na em i kisim baptais long wara bilong makim dediket bilong em long Jehova.
Long olgeta yia, planti handet tausen manmeri i gat gutpela bel ol i bihainim dispela singaut long ‘kam long Jehova.’ Taim ol i mekim olsem, ol i lukim truim bilong Sindaun 22:4, em i tok: “Sapos yu daunim yu yet na yu stap aninit long Bikpela, bai yu gat planti . . . samting na biknem, na bai yu stap gut.” Yes, ol man i save laikim tok i tru, long pasin daun ol i senisim pasin bilong ol na bihainim rot God i makim na ol i amamas long kisim kain blesing olsem long nau, na ol i bilip tru na wet long kisim blesing bilong oltaim oltaim hia long graun.—Song 37:29.
[Ol Mep long pes 18]
(Bilong save ol dispela rait i stap we long pes, lukim buk o magasin.)
Solwara Karibian
GAIANA
SURINAM
FRENS GAIANA
BRASIL
[Kredit Lain]
Graun: Mountain High Maps® Copyright © 1997 Digital Wisdom, Inc.