Wanpela Wok ‘Ol i Mekim na Ol Man i Tingim Tru’
APOSEL Pita i tokim ol wanwok Kristen: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God.” (1 Pita 2:12) Inap planti yia ol Witnes Bilong Jehova long Itali i bin kamapim dispela gutpela pasin long ai bilong ol manmeri. Ol i bihainim tok bilong Jisas long “sanap antap long haus na autim [tok] long ol manmeri,” olsem ol i mekim wok Kristen bilong ol long ples klia. (Matyu 10:27; Jon 18:20) Olsem na taim wanpela loya bilong Itali na wanpela pris i sutim tok giaman long ol Witnes Bilong Jehova long nius olsem ol i “wanpela lain i giaman tasol olsem ol i wanpela lotu,” na i wankain olsem “ol lain i save wok hait na pulim ol man,” ol Witnes i pasim tok long kisim tupela i go long kot, long wanem, ol i bagarapim gutnem bilong ol.
Long namba wan kot ol i mekim, kot i tok dispela loya na pris i no bin brukim wanpela lo. Tasol long Julai 17, 1997, Kot Bilong Apil long Venis i pasim tok olsem kot ol i bin mekim long namba wan taim i no stret, na dispela tupela man i gat asua. Dispela Kot Bilong Apil i tok: “Dispela tupela stori i bin kamap long nius i gat sampela tok long en inap bagarapim gutnem bilong ol man i save i go long lotu bilong ol ‘Witnes Bilong Jehova.’ I olsem ol i kamapim dispela stori bilong bagarapim ol man i save go long dispela lotu.” Kot i tok olsem, ‘i no stret long lo bilong gavman long raitim ol tok long niuspepa na skelim skelim samting bilong ol narapela.’ Kot i tokim tupela man bilong bagarapim gutnem bilong ol Witnes long baim kot, na baim tu olgeta pe bilong tupela kot ol Witnes i bin mekim.
Long tok bilong kot ol i skelim na raitim, dispela Kot Bilong Apil long Venis i tok olsem: ‘Yumi mas bihainim stret olgeta lo olsem konstitusen bilong Itali i makim na long dispela rot tasol bai yumi inap pasim pasin bilong bel nogut long ol narapela lain na pasin bilong birua long lain bilong narapela lotu.’ Dispela tok kot i pasim i kamapim olsem wok bilong ol Witnes Bilong Jehova i no hait, na ol i no giaman tasol olsem ol i wanpela lotu. Kot i tok: “Dispela tok olsem ol Witnes i wanpela bilong ol dispela lain i save wok hait, em i no stret na ol i no tingim ol samting tru ol i bin mekim long bipo, long wanem, dispela lotu i stap long planti biktaun, na long olgeta hap ol lain bilong dispela lotu i save mekim wok bilong kirapim man long kam insait long lotu; na ol i save mekim moa yet long Sande na long ol narapela de malolo. Ol man i save gut long dispela wok ol i mekim na dispela inap kirapim ol long tingim hatwok ol Witnes i mekim, na maski ol i ting olsem wanem long bilip ol i autim.” Em nau, pasin bilong wok strong long autim tok na gutpela pasin bilong ol Witnes Bilong Jehova long Itali i helpim ol long daunim pasin bilong ol man long bel nogut long ol.—Matyu 5:14-16; 1 Pita 2:15.