Dispela Pait Em i Bin Bagarapim i Stap Bilong Ol Man

1914

CHARLEY REESE, em wanpela man bilong raitim stori long nius (The Orlando Sentinel), em i tingting long yia 2000 na bihain long en, na em i raitim tok olsem: “Dispela pait bilong 1914 i go long 1918 em i bin bagarapim i stap bilong ol man, em i no pinis yet.” Wanem insait bilong tok bilong em? Em i stori long dispela olsem: “Ol de long kalenda i no save bosim ol samting i bin kamap bipo. Ol i tingim yia 1800 i go inap long 1900 olsem taim bilong holim ol bilip, na ol kain tingting, na ol man i gat lo long ol stretpela pasin ol i mas bihainim, tasol ol dispela pasin i no pinis long Janueri 1, 1901, nogat. Em i pinis long 1914. Na sapos yumi skelim taim bilong yumi long wankain pasin, yumi ken tok em tu i bin kirap long 1914. . . .

“Klostu olgeta pait i bin kamap long taim yumi stap laip, em dispela pait yet i as bilong en. Klostu olgeta save na pasin bilong ples em nau yumi bihainim i bin kirap long taim bilong dispela pait.

“Mi ting Namba Wan Pait i kamapim kain bagarap olsem, long wanem, em i mekim na ol man i lusim dispela bilip olsem ol man inap bosim wokabaut bilong ol yet. . . . Pait i pinisim dispela bilip bilong ol man. Ol lain em ol i bin pait long narapela narapela ol i no bin ting long kain samting olsem bai kamap. Pait i bin bagarapim strong bilong kantri Briten na Frans long bosim planti kantri. Em i bin kilim i dai ol yangpela strongpela man bilong Briten, Frans na Jemani. . . . Insait long sotpela hap taim tasol pait i bin kilim i dai 11 milion manmeri.”

Winim 120 yia samting, ol Witnes Bilong Jehova i bin makim yia 1914 olsem pinis bilong wanpela taim em Jisas i kolim olsem “taim God i bin makim bilong ol arapela lain.” (Luk 21:24) Long dispela yia, Krais Jisas​—⁠em i bin kirap bek pinis long matmat na i kisim biknem long heven​—⁠em i kamap King bilong Kingdom bilong heven. Long rot bilong dispela Kingdom, God Jehova bai pinisim tru olgeta pen na hevi i kamap na i olsem mak bilong dispela taim nau yumi stap long en.​—⁠Song 37:​10, 11; Saveman 8:9; KTH 21:​3, 4.

[Piksa Kredit Lain long pes 32]

U.S. National Archives photo