“I Gat Planti Samting Yumi Ol Katolik Inap Lainim Long Ol”
WANPELA tisa long Bari, Itali, i mekim dispela tok long ol Witnes Bilong Jehova taim em i skulim ol sumatin bilong haiskul long ol stori bilong lotu. Tisa i bin tokim klas olsem em bai mekim wok long ol video bilong skulim ol sumatin. Roberto, em wanpela sumatin i gat 18 krismas, taim em i harim dispela tok, em i askim tisa long larim ol i ken toktok tu long lotu bilong em. Roberto i givim video Jehovah’s Witnesses—The Organization Behind the Name long tisa. Tisa i orait long dispela video, na inap olsem 30 sumatin bilong wanpela klas olgeta i lukim dispela video. Roberto i tok: “Olgeta i pilim tru pasin wanbel, pasin bilong stretim gut wok, na pasin sori i stap namel long ol Witnes Bilong Jehova. Na ol i kirap nogut tru long save olsem ol Witnes i save wokim 40 milion nius Wastaua na 36 milion nius Kirap! long olgeta mun.”
Bihain long taim ol i lukim pinis video, sampela wanklas bilong Roberto i tok olsem: “Mi no bin ting yupela i save stretim gut wok olsem.” Tisa i tokim ol sumatin long ol Witnes Bilong Jehova olsem: “Lukim bilip bilong ol i kirapim ol long stap wanbel na ol i stretim gut ol wok bilong ol. I gat planti samting yumi ol Katolik inap lainim long ol.” Dispela video na toktok ol sumatin i mekim bihain long ol i lukim video i bin mekim planti samting na ol man i ken save gut long ol Witnes Bilong Jehova.