Ripot Long Wok Bilong Kingdom

Man i Bin Birua Bipo i Lainim Tok i Tru

PLANTI stori bilong dispela pait long Laibiria i bin kamap long ol nius. Planti tausen i dai, na planti planti tausen moa i no gat ol ples bilong i stap. Maski i gat ol dispela hatwok, ol man i gat gutpela bel ol i wok long kisim tok i tru, olsem stori i stap daunbilo i kamapim.

Kirap long taim James i gat 10-pela krismas, em i bin skul long Misin Luteran. Bihain James i kamap wanpela man bilong raitim stori long wanpela niuspepa bilong lotu, na em i mekim wok long namba em i holim long wok na em i raitim ol stori i nogutim ol Witnes Bilong Jehova. Em i mekim olsem, maski em i no bin bungim wanpela Witnes bipo.

Bihain James i lusim dispela wok na em i kamap papa bilong wanpela haus pasindia. Wanpela taim em i sindaun long dua bilong i go insait long dispela haus pasindia na 2-pela sista i bilas gut tru ol i kam lukim em. Taim em i lukim ol i bilas gut, em i singautim ol i kam insait. Tasol taim ol i tokim em long as na ol i kam, em i tok, “Mi gat planti wok tumas na mi no inap toktok.” Ol Witnes i soim em sabskripsen bilong Wastaua na Kirap!, na em i kisim, long wanem, bai ol i lusim em na i go. Inap 12-pela mun em i kisim ol dispela nius long haus bilong em, tasol em i no rausim long karamap na lukim, nogat, em i putim ol long wanpela bek plastik.

Wanpela bikpela pait i wok long kamap, olsem na James i pulmapim mani na ol gutpela samting bilong em long wanpela bek na bai em i ken ranawe taim pait i no go bikpela yet. Wanpela taim long moningtaim wanpela hanbom i pairap long baksait bilong haus bilong em, na em i pret na i kirap kisim bek bilong em na i ranawe, nogut em i dai. Em wantaim planti tausen manmeri i lusim haus na ol i mas i go na abrusim planti hap ples bilong skelim ol man. Long dispela hap ol i save stilim ol samting na kilim nating ol man.

Long namba wan ples bilong skelim ol man, ol i givim sampela askim long James na ol i tokim em long opim bek bilong em. Taim em i opim bek bilong em na lukluk insait long en, em i kirap nogut tru, long wanem, dispela bek em i bringim em i no dispela bek i gat ol mani na gutpela samting long en. Em i pret na kirap kisim dispela bek i gat ol Wastaua na Kirap! em i no bin opim yet na em i ranawe. Tasol taim soldia i lukim ol dispela nius na kaunim nem bilong em long karamap bilong nius, em i tok: “Yu wanpela Witnes Bilong Jehova. Mipela i no painim yupela, mipela i save yupela i no save giaman.” Soldia i kisim sampela nius long bek bilong James na bihain em i tokim James long i go.

Wankain samting i kamap long 9-pela narapela ples bilong skelim ol man, long wanem, olgeta bikman bilong ami i ting James i wanpela Witnes Bilong Jehova na ol i larim em i go na ol i no bagarapim em. Nau taim James i lukim ol dispela samting i kamap, em i amamas olsem em i no bin kisim ol gutpela samting bilong em i kam, long wanem, ol inap kilim em i dai bilong kisim ol dispela samting.

Orait taim em i kamap long laspela hap bilong skelim ol man, em wanpela hap i nogut moa, em i pret nogut tru long lukim skin bilong planti man i dai pinis i slip nabaut. Olsem na em i kirap kolim nem bilong Jehova. Em i beten olsem sapos God i helpim em long abrusim dispela ples bilong kilim ol man i dai, orait em bai mekim wok bilong God long olgeta taim em i stap laip yet.

James i givim bek bilong em long ol soldia, na ol i tok gen olsem: “Mipela i no painim ol dispela man.” Ol i tanim lukluk long em na i tokim em: “Wanpela brata bilong yupela i save sindaun daunbilo long dispela maunten. Yu go na stap wantaim em.” Em nau, long dispela taim tingting bilong James long ol Witnes Bilong Jehova i senis olgeta. Kwiktaim em i go lukim dispela brata, na stretim tok bilong mekim Baibel-stadi long buk Yu Inap i Stap Oltaim Long Paradais Long Graun.a

Sampela de bihain, wanpela pait i kamap long dispela ples na em i mas ranawe lusim dispela hap. Na long dispela taim, em i holim tasol buk Stap Oltaim bilong em na ranawe i go insait long bus. Taim James i stap 11-pela mun longwe long ol Witnes, em i stadi long buk olgeta inap 5-pela taim. Taim em i kam bek long taun, em i kirap stadi gen wantaim ol Witnes na i wok long kamap strong. I no longtaim na em i kisim baptais, na nau em i givim bel long mekim wok bilong Jehova wantaim ol brata spirit bilong em.

[Futnot]