Wanpela Pasin Sori i Winim Sori Bilong Mama
LONG ol ples bilong kisim tren, long ol toilet em olgeta man i ken mekim wok long en, o long ol rot em planti man i save go i kam long en, ol mama i save tromoi ol nupela pikinini ol i karim. Sampela taim ol man bilong kisim pipia i save painim ol liklik bebi insait long dram pipia tu, em ol i sotwin tru na ol i no inap krai moa long mama bilong ol. Nius O Estado de S. Paulo i tok, “dispela pasin bilong ol mama i tromoi ol bebi long ol rot i wok long i go bikpela.” Tru, ating bihain dispela yangpela mama bai bel hevi long pasin em i bin mekim. Tasol em i kirap tasol na tromoi pikinini, maski pikinini bilong em inap i dai.
Ating yu tingting, ‘Olsem wanem na wanpela mama inap tingting long tromoi bebi bilong em na i no tingim ol samting bai painim em bihain?’ Baibel i mekim tok piksa long kain hevi olsem bilong stori long pasin bilong Man bilong wokim olgeta samting long tingim ol samting em i wokim: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a? Ating wanpela mama inap mekim olsem, tasol mi no inap tru lusim tingting long yupela. Nogat tru.”—Aisaia 49:15.
Tru, mama i save laikim yumi, tasol God i save laikim yumi moa yet na em i save tingim tru yumi long ol samting yumi sot long en. Maski yu yangpela o lapun, na wanem wanem hevi i painim yu, yu no stap wanpis. Man bilong wokim yu i laik helpim yu na em i tingim yu tru. Olsem man bilong raitim Song i tok, “maski papa na mama i givim baksait long mi, Bikpela bai i lukautim mi.”—Song 27:10.
Long olgeta hap bilong graun, ol i wokim nius Wastaua na Kirap! bilong givim save long ol man long “God tru,” em Jehova, na pikinini bilong em, Krais Jisas, na long dispela rot ol man i laikim na kisim save long dispela tok ol i ken kisim laip oltaim.—Jon 17:3.