Wanpela Ailan i Liklik na i Stap Longwe

WANPELA tok ol i save kolim oltaim bilong makim ailan Sen Helina em dispela tok, “i stap longwe” na “liklik.” Dispela tok i stret tru long dispela ailan, em longpela bilong en inap 17 kilomita na braitpela bilong en inap 10 kilomita, na em i stap longwe long nambis bilong saut-wes Afrika inap 1,950 kilomita na i no gat narapela hap graun i stap klostu long en. Em dispela ailan ol i bin salim Napoléon Bonaparte long en long 1815 na bai em i mas i stap na i dai long dispela hap.

Taim yu stap long solwara, dispela ailan i olsem wanpela strongpela ailan. Tasol dispela ailan i gat volkeno i no save pairap moa na as bilong en i kirap long solwara Atlantik na i gat ol maunten i sanap stret na i go antap inap olsem 500 i go 700 mita. Long namel em Maunten Aktian, em i go antap inap 818 mita. Kolwin i save kam long hap saut bilong solwara Atlantik na win bilong solwara i mekim na dispela ailan i no hat tumas o kol tumas​—⁠i olsem namel tasol. Tasol long nambis na i go inap long hap i gat ol maunten, i gat kain kain taim olsem ren na san, na kain kain diwai na gras samting.

Briten i bin bosim Sen Helina kirap long yia 1600 samting. Inap olsem 5,000 manmeri i stap long dispela ailan, na ol tumbuna bilong ol i bilong narapela narapela hap, olsem Yurop, Esia, na bilong Afrika yet. Ol i save mekim tok Inglis long olgeta hap bilong ailan, tasol nek bilong en i narapela kain. I no gat ples balus long ailan; ol inap i go long ol narapela hap long sip tasol, na long olgeta taim ol sip i save go long Saut Afrika na Inglan. Na long Jun 1990 tasol ol i kamapim stesin bilong televisen long dispela ailan long rot bilong wanpela satelait.

Long 1931 samting, gutnius bilong Kingdom bilong God i go kamap long dispela ailan long namba wan taim. (Matyu 24:14) Kirap long dispela taim na i kam inap nau, planti manmeri long ailan i bin holimpas dispela gutpela samting i win tru na i mekim ol mani kago bilong skin i olsem samting nating tasol. (Matyu 6:​19, 20) Long nau, i gat wanpela Witnes long olgeta 31 man long Sen Helina, na dispela i winim olgeta narapela kantri!

[Ol Mep long pes 24]

(Bilong save ol dispela rait i stap we long pes, lukim buk o magasin)

Sen Helina

JEMSTAUN

Levelwut

AFRIKA

SOLWARA ATLANTIK

Sen Helina