“Mi Pilim Tru Bel Isi i Stap Namel Long Ol”

WANPELA man i save long tok Jeman i go long wanpela kibung ol Witnes Bilong Jehova i redim bambai em i ken lukstil long pasin bilong ol Witnes. Bilong wanem em i laik lukstil? Em i laik “kamapim klia pasin bilong dispela lain na pasim ol pren bilong em na bai ol i no ken lusim stretpela rot.” Em i go long kibung na bihain em i raitim pas i go long ol pren bilong em, olsem i stap daunbilo:

“Taim mi kamap long ples bilong kibung, mi tingting, mi kam long ples i stret o nogat. Mi no lukim wanpela man, na i no gat pipia o tin bilong bia long graun. Taim mi go klostu, mi lukim tupela man i bilas gut na i sanap long dua bilong haus stediam. Ol i gude long mi na larim mi i go insait.

“Mi ting bai mi harim pairap bilong planti tausen manmeri bai i bung, tasol nogat, ples i no gat pairap tru. Mi tingting, ‘ating i no planti manmeri olsem na ol i sindaun wan wan long narapela narapela hap bilong dispela stediam.’

“Taim mi go insait, kwiktaim mi lukim wanpela pilai ol i wokim long pletfom. Bihain mi kisim save olsem planti tausen manmeri i pulap nogut tru long dispela ples bung, em ol i laik tru long harim tok. Mi pilim tru bel isi i stap namel long ol. Ol samting mi harim, na lukim, na pilim long hap de bilong kibung i stap yet, dispela i bin kirapim mi tru.

“Taim mi bung na toktok wantaim ol Witnes, mi lukim pes bilong ol i amamas na ol i mekim pasin bilong laikim tru ol narapela. Kwiktaim mi tingting, ‘Dispela em ol lain tru bilong God!’ ”

Dispela yangpela man i no pasim ol pren bilong em, nogat; em i kirap askim ol long stadi long Baibel wantaim em. Wanem samting i kamap? Long nau em i wanpela elda Kristen. Em na famili bilong em ol i strongpela Witnes long wanpela kongrigesen long Suk, Swiselan.