Ol i Putim Bek Nem Bilong God

INAP planti handet yia ol man i bin rausim nem Jehova long Baibel, na ol witnes bilong em long nau, em dispela wanpela lotu Kristen tasol, ol i strong long holimpas na putim bek dispela tetragramaton.”a

Dispela tok hia i stap long buk Jeová dentro do Judaísmo e do Cristianismo (Jehova insait long lotu Juda na lotu Kristen), em buk bilong Assis Brasil, em wanpela man bilong Brasil i save raitim buk. Tasol ating bai i gat askim olsem: Tru, sampela Baibel i putim nem bilong God long narapela narapela pasin tasol bilong wanem ol narapela lotu i rausim dispela nem long Baibel bilong ol? Brasil i tok: “Ol i rausim nem bilong God, long wanem, ol i tingim ol bilip giaman bilong ol . . . , o ol i gat narapela kain tingting, o ol i gat laik long litimapim nem bilong Jisas na mama bilong em, Maria.”

Tasol Mista Brasil i tok stret: “Long Baibel New World Translation of the Holy Scriptures long tok Potugal, ol i stretim bek nem [bilong God] ol narapela Baibel i bin rausim.” Ol i mekim olsem wanem? Long dispela Baibel ol i putim bek nem Jehova long olgeta ples stret bilong en. Dispela nem Jehova i stap inap 7,200 taim long Baibel New World Translation.

Kirap long taim ol i wokim nupela, ol i bin tilim 6,500,000 bilong dispela Baibel em ol i tanim long tok Potugal bilong nau na ol i bin tanim ol tok bilong en stret olsem em i stap long Baibel Grik na Hibru. Olsem na wanpela man bilong raitim ol stori long wanpela niuspepa (Diário do Nordeste) bilong Brasil, em i askim olsem: “Olsem wanem? Yu save olsem God i gat nem?” Gutpela tru i gat dispela Baibel ol i bin tanim long taim bilong yumi, na nau planti milion manmeri i ken tok, “Yes. Nem bilong God em Jehova.”

[Futnot]