Pait na Bagarapim Man—Klostu Nau Bai Pinis!
“Pait na Bagarapim Man i Mekim Nogut Long Kantri”—The New York Times, Yunaitet Stets.
“Pait Insait Long Famili”—O Globo, Brasil.
“Pasin Bilong Bagarapim Meri i Kamap Long Olgeta Hap”—The Globe and Mail, Kanada.
OL DISPELA het-tok bilong ol nius long Not na Saut Amerika i makim olsem, long olgeta hap bilong graun, i gat pasin bilong pait na bagarapim man. Wol Helt Oganaisesen i tok, “olgeta kain pasin bilong pait na bagarapim man i go bikpela moa long taim bilong yumi.”
Tingim ol dispela samting:
Kilim man i dai. Long hap bilong Latin-Amerika na Karibian ol i save kilim i dai olsem 1,250 manmeri long olgeta wan wan de. Olsem na “long 50 pesen bilong ol kantri long dispela hap, pasin bilong kilim man i dai em i namba 2 bikpela samting i mekim na ol yangpela i gat 15 i go inap 24 krismas ol i dai.”
Bagarapim pikinini. Long olgeta hap bilong graun, i gat pasin bilong paitim pikinini, mekim pasin sem long em, na bagarapim bel na tingting bilong em. Olsem: “Long sampela kantri i gat planti wok bisnis, ol i bin givim askim long ol man i bikpela pinis na ol i painimaut olsem 10 i go inap 15 pesen bilong ol pikinini, em planti ol i meri, ol i bin kisim nogut—ol man i bin mekim pasin sem long ol.”
Paitim meri. Wanpela lain i skelim ol samting i bin kamap long olgeta hap bilong graun long 1997, em ol samting i bin pasim ol man long mekim ol samting i stret long ol i ken mekim, na ol i kisim save olsem, long klostu olgeta kantri, “pait insait long marit em i olsem namba wan bikpela samting i mekim na ol meri i kisim bagarap.” (Human Rights Watch World Report 1998) Pasin bilong pait insait long marit em i kamap long planti hap, tasol dispela pasin i no kamap ples klia, long wanem, planti meri i no save tokaut long dispela samting.—The Globe and Mail, Kanada.
Long olgeta hap bilong graun, long taim bilong Noa, ol man “i wok long pait na bikhet tasol.” (Stat 6:9-12) Tasol taim God Jehova i ‘mekim bikpela tait i kamap long ol manmeri i givim baksait long em,’ em i lukautim Noa, em “man bilong tokaut long stretpela pasin,” wantaim famili bilong em. God bai mekim wankain samting long taim bilong yumi. Taim em i pinisim ol man nogut na ol man bilong pait na bagarapim man, em bai lukautim “ol man i bihainim God,” na em bai mekim dispela graun i kamap wanpela paradais long nupela taim em i tok promis pinis long kamapim. (2 Pita 2:4-9; 3:11-13) Ating yu amamas tru long save olsem klostu nau pasin bilong pait na bagarapim man bai pinis olgeta, a?