Samting i Winim Tru Pasin Bilong Penim Pes

TAIM aposel Pita i stori pinis long ol samting bilong “bilasim skin” ol meri i save mekim wok long en, em i tok: “Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God.”​—⁠1 Pita 3:​3, 4.

Taim aposel Pita i toktok long pasin bilong putim bilas, em i mekim wok long wanpela tok Grik, koʹsmos, dispela tok i as bilong wanpela tok Inglis em “cosmetic,” na insait bilong en i olsem “mekim i kamap naispela, em ol i mekim moa yet long pes.” Olsem wanem? Pita i putim tambu olsem ol meri Kristen i no ken penim pes o mekim kain samting olsem bilong bilasim skin? I no gat wanpela hap long Baibel i tok olsem. Nogat. Baibel i makim olsem em samting bilong wan wan yet long skelim, olsem na yumi ken save ol narapela narapela pasin bilong bilasim skin i mas kamap.

Tasol sapos ol i penim tumas pes bilong ol o ol i mekim inap long ol narapela i tingting planti long en, orait dispela i givim wanem tingting long ol manmeri? Ating bai ol i ting dispela meri em i wanpela hatpela meri, em i gat pasin antap, em i luk nogut, na i hambak na bilas tumas, o em i tingim em yet tasol? Tru tumas, dispela pasin inap mekim na ol man i tingting nogut long wanpela meri, na ating ol i ting em i meri bilong rot.​—⁠Skelim wantaim Esekiel 23:​36-​42.

Olsem na wanpela meri “i laik bihainim tok bilong God”​—⁠sapos em i tingting long penim pes, em bai wok strong long mekim ol samting na bai pes bilong em i kamapim stretpela tingting bilong em, na pasin bilong isi isi long man, na gutpela pasin na pasin daun. Ol dispela pasin bai soim tru em i wanpela naispela meri. Maski em i penim pes o nogat, em bai kamapim klia ol gutpela pasin i stap long bel bilong em. Dispela bai kamapim klia olsem em i save, i gat wanpela samting i winim tru pasin bilong penim pes, olsem tok bilong Pita yumi kamapim antap i makim.​—⁠1 Timoti 2:​9, 10.