Save ‘Long Samting Bai Painim Yu Bihain’
“OL I wanpela lain i no gat gutpela tingting, na tingting bilong ol i sot tru. Sapos ol i gat gutpela tingting, ol inap save long dispela samting na luksave long wanem samting bai painim ol bihain.”—Lo 32:28, 29, Baibel Beck.
Moses i bin mekim ol dispela tok long ol Israel taim ol i sanap long boda bilong Graun Bilong Promis. Moses i toktok long wanpela taim bihain, na long dispela taim ol bai lusim Jehova na ol bai i no tingting liklik long ol hevi bai painim ol sapos ol i lusim Jehova. Insait long sampela handet yia bihain long dispela, ol manmeri bilong Israel—na tu, planti king bilong ol—ol i bin sakim ol tok lukaut bilong God.
Yumi ken tingim Solomon, em i save long lo bilong God i tok long ol i no ken maritim ol meri i save lotuim ol god giaman na i no save lotuim Jehova. (Lo 7:1-4) Tasol em i maritim “planti meri bilong ol arapela kantri.” Wanem samting i kamap long dispela? Baibel i tok: “Long taim em i lapun, ol dispela meri bilong en i pulim tingting bilong en i go long ol giaman god. Olsem na Solomon i lusim pasin bilong papa bilong en, Devit, na Solomon i no bihainim tru God, Bikpela bilong en.” (1 King 11:1, 4) Em i gat gutpela tingting na save, tasol Solomon i no tingting gut na luksave long wanem samting bai kamap long bihain sapos em i no bihainim lo bilong God.
Olsem wanem long yumi? Sapos yumi lusim sampela taim long skelim gut ol samting yumi laik mekim long laip bilong yumi, yumi inap abrusim planti hevi. Olsem: Baibel i tokim ol Kristen long “rausim olgeta pasin doti bilong bodi na bilong spirit.” (2 Korin 7:1) Dispela em wanpela gutpela tok, tasol planti i no gat gutpela tingting bilong luksave long wanem samting bai kamap sapos ol i sakim tok bilong Pol. Olsem: Planti yangpela i save bagarapim skin bilong ol long rot bilong smok; ol i ting dispela i mekim ol i luk olsem wanpela saveman na man i bikpela pinis. Sori tru, bihain planti bilong ol i save kisim sik bilong klok, kensa long wetlewa, o sik emfisima!
Em i bikpela samting long yumi skelim gut wanem samting bai painim yumi taim yumi mekim wanpela samting. I gat as tru na Pol i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.”—Galesia 6:7, 8.