Tok Bilong Helpim Ol Yangpela Long Makim Ol Gutpela Poroman
WANPELA ripot long buk Reader’s Digest i tok, ol yangpela i save go long ol poroman bilong ol long kisim tingting bilong ol long wanem kain klos ol bai pasim na wanem kain musik ol bai harim—ol i no kisim tingting bilong papamama. Olsem na em i bikpela samting long ol papamama i mas save long ol poroman bilong pikinini na ol i raun we.
Wanpela tisa bilong wanpela yunivesiti long Saut Afrika, em Esmé van Rensburg, em i tok: “Em wok bilong yupela long painimaut.” Em i tok moa: “Ating pikinini bai kros long yupela, tasol bihain bel bilong em bai kol.” Na em i givim ol dispela tok bilong helpim ol papamama. Ol lo yupela i putim i mas i gat gutpela as bilong en; putim yau long tok bilong pikinini; no ken kirap nogut na kros samting, tasol stap isi, na tingim ol tok yupela i laik mekim. Sapos pikinini bilong yupela i kirap pinis long bung wantaim ol poroman nogut, i gutpela sapos yupela i kamapim klia pasin nogut dispela pasin pren i bin kamapim; nogut yupela i putim tambu tasol long pikinini i no ken poroman moa wantaim ol dispela poroman nogut.
Ol gutpela tok bilong helpim ol papamama i bin stap longtaim pinis long Baibel, em Tok Bilong God. Olsem: Baibel i tok: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jems 1:19) Na tu, Baibel i givim dispela gutpela tok bilong helpim yumi long makim gut ol man yumi laik poroman wantaim ol: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Ol dispela tok i soim olsem gutpela tingting na save i stap bilong helpim ol man i amamas long kaunim Baibel na bihainim ol tok bilong en long olgeta de.