“Bilip i Mekim na Ol i Sanap Strong”

LONG yia 1998 ol i kamapim wanpela nupela buk long tok Frans, nem bilong en Les Témoins de Jéhovah face à Hitler (Hitler i Putim Bikpela Hevi Long Ol Witnes Bilong Jehova), em Guy Canonici i bin raitim, na ol man i litimapim nem bilong dispela buk. François Bédarida, em wanpela saveman bilong raitim stori bilong ol samting i bin kamap bipo, em i raitim sampela tok long tok i go pas long dispela buk olsem: ‘Mipela i amamas tru long dispela buk. Ol man i mas save long ol samting buk i stori long en, na tu, dispela buk i kamap long taim stret. Tru, ol saveman bilong dispela graun ol i save long en, tasol husat moa ol i save long ol bikpela hevi i bin painim ol Witnes Bilong Jehova em ol i bin stap aninit long gavman bilong Hitler? Taim Hitler i bosim ol man inap 12-pela yia, insait long ol dispela taim ol i birua long ol Witnes na oltaim ol i mekim nogut long ol Witnes na paitim ol. Ol Witnes tu i bin kisim nogut long ol haus kalabus nogut. Ol Witnes tu i bin dai bilong holimpas bilip. Bilong wanem na i no gat stori bilong ol dispela samting i bin painim ol dispela Kristen? . . .

‘Bilong wanem na ol i bin mekim nogut tru long dispela liklik lain lotu em ol i no save bagarapim ol man, na ol i stap nabaut long olgeta hap bilong graun? Dispela samting i narapela kain tru. Ol Witnes i wanpela liklik lain tasol long Jemani. I gat 60 milion manmeri long Jemani na insait long dispela lain, i gat olsem 20,000 manmeri em ol Witnes. Na tu, ol i gutpela manmeri na ol i save stap isi na daun long ol lo na ol i no save mekim nogut long wanpela man. Ol i save laik long wok na mekim bikpela long ol pikinini long gutpela rot. . . .

‘Dispela bikpela hevi i bin kamap long ol bilipman, em ol polis bilong gavman i bin paitim ol nogut tru, em i no daunim ol​—⁠ol dispela bilipman i gat strong long sakim ol samting nogut ol man i mekim long ol na ol inap sanap strong yet, long wanem, ol i bilip strong long Jisas Krais na ol i redi long i dai bilong holimpas bilip.’

Ol Witnes Bilong Jehova i bin kisim bikpela pen na ol i dai bilong holimpas bilip Kristen bilong ol long taim ol man i birua long lotu bilong ol, na dispela stori em i gat strong. Wanpela bikpela nius bilong ol Katolik long Frans, em La Croix, em i stori long dispela buk na i tok: “Ol man i no save tumas long stori bilong ol samting i bin painim ol Witnes, na Guy Canonici i tokaut long planti samting i bin painim ol Witnes. Em i tokaut olsem strongpela bilip i mekim na ol Witnes i sanap strong i go inap long pinis, na ol pikinini tu i bin holimpas wankain bilip. Taim ol man i kaunim dispela stori ol bai kirap nogut long en. Long nau dispela stori i mas givim sampela tingting long ol man em ol i wok long paitim tok olsem ol Witnes Bilong Jehova ol i Kristen o nogat.”