Wanpela Bikpela Yia Bilong Tilim Baibel

LONG nau planti man tru i gat Baibel, winim long olgeta taim bipo. Dispela tok em ripot wanpela lain (United Bible Societies) i kamapim, na ol i mekim dispela tok, long wanem, namba bilong ol Baibel ol i bin tilim long 1998 i winim ol Baibel ol i bin tilim long 1997 inap olsem 500,000 samting. Ol i bin tilim 585,000,000 Baibel olgeta o sampela hap bilong en long olgeta hap bilong graun. Ripot i tok: “Dispela i strongim bel bilong yumi. Long nau planti manmeri i wok long kisim save long Tok Bilong God.”

Tasol man i gat Baibel na man i kaunim Baibel, dispela em i narapela narapela kain. Olsem: Wanpela wok painimaut ol i bin mekim em i kamapim olsem klostu olgeta (90 pesen) bilong ol lain Amerika i gat wanpela Baibel, na wankain namba i bilip olsem Baibel i gutpela buk bilong lainim ol man long stretpela pasin. Tasol 59 pesen tasol i tok olsem ol i save lukim Baibel bilong kisim sampela tok bilong helpim ol. Na 29 pesen i tok olsem ol i “no save gut” o ol i “no save” long Baibel.

Ol Witnes Bilong Jehova i save wokim na tilim ol Baibel long ol man, na tu ol i save mekim stadi long Baibel wantaim ol man long 230 samting kantri. Dispela wok bilong skulim ol man long Baibel i wok long helpim planti milion manmeri long olgeta hap bilong graun long nau. Dispela skul i helpim ol long karim ol hevi i painim ol long nau, na ol i kisim save long ol gutpela samting Baibel i tok bai kamap long bihain, taim Kingdom bilong God i bosim graun.​​—⁠Aisaia 48:​17, 18; Matyu 6:​9, 10.

[Ol Piksa long pes 32]

Ol i mekim ol Baibel-stadi long Bolivia, Gana, Inglan, na Sri Lanka (kirap long han kais antap)