Ol Man—Yu Ting Ol i Wanpela Animal i Winim Ol Narapela Animal?

“Olsem wanem? Bilip bilong yumi long ol man i kamap olsem wanem, em i bikpela samting?”

Wanpela yangpela meri long Brasil i gat 16 krismas em i kamapim dispela askim long kirap bilong wanpela stori em i bin raitim, nem bilong en “Ol Man​—⁠Yu Ting Ol i Wanpela Animal i Winim Ol Narapela Animal?” Taim tisa i kisim pinis Kirap! bilong Jun 22, 1998, i stori long dispela samting, em i singautim dispela sumatin long stori long klas long dispela askim.

Dispela yangpela Witnes i tok olsem dispela tok bilong evolusen ol i lainim ol man long en em i nogut tru, na as bilong dispela tingting em dispela tok olsem ol samting i no gat strong, ol i save dai na lus olgeta, tasol ol samting i gat strong ol i stap laip na ol i wok long kamap planti. Olsem: Planti man i ting dispela tingting bilong evolusen i mekim na sampela man i ting pait em i wanpela pasin bilong yumi man, olsem oltaim yumi gat pait long i stap laip, na dispela tingting i opim rot long gavman Fasis na gavman Natsi i kamap.

Dispela sumatin i kamapim olsem ol man i narapela kain tru long ol animal. Em i tok: “Ol man tasol inap kamap strong long ol samting bilong spirit. Ol man tasol i save wok strong long kisim save long as tru bilong i stap bilong ol. Ol man tasol i save bel hevi taim wanpela i dai, na ol i save tingting long ol i kamap olsem wanem, na ol i gat laik long stap oltaim oltaim. Em i bikpela samting long yumi mas lusim sampela hap taim long kisim sampela save moa long yumi bin kamap olsem wanem!”

Tisa i litimapim dispela gutpela stori sumatin i bin kamapim. Em i tok, sumatin i bin kamapim gut dispela stori, long wanem, dispela yangpela Witnes i save laik long kaunim ol buk. Long skul ol narapela i save olsem dispela meri em i meri bilong kaunim ol buk bilong Baibel olsem Kirap! na Wastaua.

Ol Witnes Bilong Jehova i tingim ol samting em dispela tingting bilong evolusen inap mekim long bel na tingting bilong ol yangpela manmeri. Long dispela as, long kongrigesen dispela meri i save i go long en ol i kirapim ol yangpela Witnes long tilim Kirap! bilong Jun 22, 1998, long ol tisa na wanskul bilong ol. Ol i tilim 230 nius long ol narapela narapela skul long dispela taun. Bos bilong Dipatmen Bilong Saiens long wanpela skul i kisim sabskripsen bilong Kirap!

Em nau, bilip bilong yumi long ol man i bin kamap olsem wanem, dispela em i bikpela samting tru! Dispela yangpela meri na ol pren bilong em i kamapim olsem pasin bilong bilip long Man bilong wokim olgeta samting i bin senisim i stap bilong ol.