Wanpela Samting Bilong Nu Yok Em i Save Tingim Yet
KIRAP long 1951 samting ol i putim dispela toksave yumi lukim long piksa long wanpela haus faktori bilong Sosaiti Was Taua long Bruklin, Nu Yok. Ol man i save i go i kam long wok, ol turis, na sampela i raun long dispela hap, dispela toksave i kirapim ol long kaunim Baibel long olgeta de. Pas i stap daunbilo em mipela i kisim long wanpela yangpela meri Witnes em i kamapim klia samting dispela toksave i mekim long ol man.
“Mi toktok wantaim wanklas bilong mi long ol samting mi bai mekim taim mi pinis long skul. Mi kirap toktok long Betel, em nambawan ofis bilong ol Witnes Bilong Jehova, na em i amamas tru long dispela. Em i tokim mi olsem em i bin sindaun long Nu Yok Siti kirap long taim em i liklik yet. Famili bilong em i no lain bilong lotu, tasol long olgeta moning, taim em i lukluk i go ausait long windo, em i lukim wanpela toksave i tok olsem: ‘Kaunim Tok Bilong God Em Baibel Holi Long Olgeta De.’ Olsem na long olgeta de, paslain long em i go long skul em i kaunim Baibel bilong em.
“Taim ol i lusim biktaun na i go sindaun long narapela ples, em i tok, wanpela samting em i save tingim yet long Nu Yok em i olsem: Taim em i kirap long moningtaim em i save lukim wanpela toksave bilong kirapim em long kaunim Baibel bilong em. Dispela toksave i stap long haus bilong Wastaua em i mekim na em i bin kaunim Baibel long olgeta de, na nau em i save kaunim yet Baibel long olgeta de!”
Em i gutpela rot tru long kaunim wanpela hap bilong Baibel long kirap bilong de. Taim yu mekim olsem yu bai pilim tru tok bilong aposel Pol: “Dispela ol buk [holi] ol inap long givim gutpela tingting long yu, na bai yu bilip long Krais Jisas, na bai God i kisim bek yu.”—2 Timoti 3:15-17.