Givim Ol Samting i Gutpela Tru Long Ai Bilong Jehova

Brens-ofis bilong ol Witnes Bilong Jehova long Mosambik i kisim dispela pas i stap daunbilo:

“Mi wanpela manki i gat 7-pela krismas. Mi skul yet long komyuniti skul. Mi salim dispela mani mi bin kisim long taim mi maketim wanpela pikinini kakaruk. Mi bin kisim 12,000 Metikis [1 dola]. Mi tenkyu long Jehova long mekim na namba wan pikinini kakaruk mi bin lukautim em i kamap bikpela kakaruk. Mi laik bai yupela i mekim wok long dispela presen mi givim long mekim wok bilong Kingdom bilong Jehova.

“Papa i helpim mi long raitim dispela pas.”

Sampela man i save ting, ol man i gat planti samting bilong skin ol tasol i save givim samting long ol narapela. Tasol taim yumi kaunim stori bilong Baibel i toktok long wanpela rabismeri i bin putim “tupela liklik mani i go long bokis,” dispela i makim olsem taim man i givim samting, i no olsem em i gat planti samting na em i givim, nogat, bel i mas kirapim em long givim.​—⁠Luk 21:​1-4.

Jehova i save amamas long olgeta presen, maski em i liklik tru, sapos yumi laikim em tru na bel i kirapim yumi long givim samting em bai amamas. Na em i save mekim gut tru long ol man i bihainim pasin bilong em long givim samting, na ol i givim taim, o strong, o ol samting bilong skin ol i gat bilong mekim wok bilong Kingdom.​—⁠Matyu 6:33; Hibru 6:⁠10.