‘Bikpela, Bai Mi Wokabaut Raunim Alta Bilong Yu’
“BIKPELA, mi wasim han bilong mi bilong soim yu mi no gat rong. Na mi wokabaut raunim alta bilong yu, na mi lotu long yu.” (Song 26:6) King Devit i mekim dispela tok bilong kamapim olsem em i givim bel olgeta long Jehova. Tasol bilong wanem na em bai “wokabaut raunim” alta bilong Jehova, na em bai mekim olsem wanem?
Devit i tingim ples tru bilong lotuim Jehova em haus lotu sel i gat wanpela alta ol i wokim long kapa na em i bilong mekim ol ofa long en, na taim Devit i mekim wok king, dispela haus lotu sel i stap long Gibeon long hap not bilong Jerusalem. (1 King 3:4) Bikpela bilong alta em inap 2.2 skwe mita tasol, na em i liklik long dispela bikpela alta ol bai wokim insait long banis bilong tempel bilong Solomon.a Tasol Devit i laikim yet dispela haus lotu sel na alta bilong en. Dispela em ples tru bilong lotuim Jehova long hap bilong Israel.—Song 26:8.
Long dispela alta ol i wokim ol ofa em paia i kukim olgeta, na ofa bilong mekim ol manmeri i kamap wanbel wantaim God, na ofa bilong tekewe sin, na long olgeta yia ol i wokim ol ofa bilong Bikpela De Bilong God i Tekewe Sin Bilong Ol Manmeri bilong dispela kantri. Dispela alta na ol ofa ol i save mekim i makim sampela samting long ol Kristen bilong nau. Aposel Pol i tok olsem dispela alta i makim laik bilong God, na long dispela rot Em i orait long wanpela ofa i stret olgeta bilong tekewe sin bilong ol manmeri. Pol i tok: “Jisas Krais i bihainim laik bilong God, na em i givim bodi bilong em yet olsem ofa wanpela taim tasol. Na long dispela pasin em i mekim yumi i kamap ol lain manmeri bilong God stret na yumi stap holi.”—Hibru 10:5-10.
Taim ol pris i laik mekim wok long alta, long olgeta taim ol i save wasim han bilong ol long wara bilong mekim ol yet i kamap klin. Olsem na King Devit tu i mekim samting i stret—taim em i laik “wokabaut raunim alta” em i wasim han bilong em bilong soim olsem em “i no gat rong.” Em i “wokabaut long stretpela pasin na bihainim olgeta lo.” (1 King 9:4) Sapos em i no wasim han bilong em, dispela lotu em i mekim—olsem wok em i mekim bilong “wokabaut raunim alta”—God i no inap orait long en. Devit i no bilong lain Livai na em i no inap mekim wok olsem pris long alta. Na maski em i wanpela king, em i no inap i go insait long banis bilong haus lotu sel. Tasol em i wanpela Israel i stap gut long God, olsem na em i bihainim ol Lo Bilong Moses na oltaim em i save kisim ol ofa bilong em i kam bilong wokim ofa long alta. Wok bilong mekim lotu i tru em i nambawan bikpela samting long i stap bilong Devit, na long dispela pasin bilong em i olsem em i wokabaut raunim alta.
Olsem wanem? Long nau yumi inap bihainim pasin bilong Devit? Yumi inap. Yumi tu i ken wasim han bilong yumi olsem man i no gat asua na yumi ken wokabaut raunim alta bilong God sapos yumi bilip long ofa bilong Jisas na ‘yumi no mekim pasin nogut na bel bilong yumi i klin’ na yumi givim bel long mekim wok bilong Jehova.—Song 24:4.
[Futnot]
a Bikpela bilong dispela alta em inap 9 skwe mita.
[Piksa long pes 23]
Dispela alta i makim samting Jehova bai mekim, em long dispela rot em bai mekim wanpela ofa i stret bilong tekewe sin bilong ol manmeri