Stap Gut Long Jehova

LONG nau i no gat planti manmeri i bihainim pasin bilong i stap gut long narapela, tasol dispela pasin i olsem mak bilong ol wokboi bilong trupela God, Jehova. Man i stap gut long narapela em i save sanap strong taim ol hevi i painim em na em i no surik maski planti yia i lus. Tingim gutpela King Hesekia. Baibel i tok: “I no gat wanpela king bilong Juda i bin bilip strong long God olsem Hesekia. Bilip bilong en i winim bilip bilong ol king i stap paslain long em na bilong ol king i kamap bihain long em.” Wanem samting i mekim na Hesekia em i narapela kain? “Em i pas tru long Bikpela” maski em i stap namel long ol man i lotuim god giaman Molek. Em nau, Hesekia i no lusim Jehova. Nogat. Em i bihainim gut olgeta lo bilong em.​—⁠2 King 18:​1-6.

Narapela man i bin i stap gut long Jehova em aposel Pol. Stori bilong wok autim tok bilong em i stap long Ol Skripsa Grik i kamapim gut pasin bilong em long sanap strong na givim bel olgeta long mekim wok bilong God. Klostu long pinis bilong laip bilong em hia long graun, Pol inap tok long em yet olsem: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God.”​—⁠2 Timoti 4:⁠7.

Hesekia na Pol i bin i stap gut long Jehova na tupela i stap olsem gutpela piksa yumi ken bihainim! Yumi mas bihainim bilip bilong ol na stap gut long gutpela God bilong yumi, Jehova.​—⁠Hibru 13:⁠7.