Husat Bai Pinisim Pait?
LONG Septemba 1999, Seketeri-Jeneral bilong Yunaitet Nesen, Kofi Annan, i tok amamas long ol manmeri bilong ol arapela kantri i kam bung long namba 54 miting bilong Jeneral Asembli i save kamap long olgeta yia. Nius The Toronto Star i kamapim wanpela ripot long strongpela tok em i bin mekim long ol dispela hetman bilong olgeta hap ol i bin kam bung, Em i tok: “Bikpela lain manmeri tru i laik bai olgeta lain bilong graun i mas mekim sampela samting bilong helpim ol na ol i no ken tok sori tasol. Ol dispela manmeri i laik bai ol man bilong olgeta hap i mas painim wanpela gutpela rot bilong helpim ol na pinisim ol pait, na ol bai stap gut na kisim gutpela sindaun.”
Yu ting Yunaitet Nesen na ol kantri i insait long en ol inap “painim wanpela gutpela rot” bilong pinisim pait? Long dispela ripot yet, nius i kolim tok Presiden Bill Clinton i bin mekim, olsem: “Taim yumi lukim planti blut i kapsait pinis long taim bilong yumi, yumi save em i no hatwok long tok olsem dispela samting ‘i no inap kamap gen,’ tasol em i hatwok long truim dispela tok.” Em i tok moa olsem: “Taim yumi mekim planti tok promis tumas, dispela i nogut na em i wankain olsem yumi no save tingim ol man.”
Winim 2,500 yia i go pinis, profet Jeremaia i tok long wok ol man i mekim bilong stretim ol hevi, olsem: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Orait, wanem samting tasol inap pinisim ol pait?
Olsem yumi kaunim long Aisaia 60:18, God i tok: “Long olgeta hap bilong graun yu bosim bai i no gat nois moa bilong ol man i pait nabaut na brukim na bagarapim ol samting.” Namba wan truim bilong dispela tok profet i bin kamap taim God i bringim ol lain manmeri bilong em i bin kalabus i go bek long ples bilong ol. Na bikpela truim bilong en bai kamap bihain na yumi bai amamas long en. God Jehova i no save “mekim planti tok promis tumas.” Em i God Antap Tru na em i Man bilong wokim yumi, olsem na em tasol inap pinisim “ol pait.” Taim Kingdom bilong God i bosim graun, bel isi bai stap. Ol pait bai pinis olgeta inap oltaim oltaim!—Daniel 2:44.