Bilong Wanem Yumi Mas Lusim Rong Bilong Ol Narapela?
WANPELA nius bilong Kanada (The Toronto Star) i tok: “Ol saientis i kirapim wanpela wok painimaut i kamapim olsem taim man i lusim rong bilong narapela man, dispela inap mekim na bel i stap gutpela na skin bilong man inap kamap strong na no gat sik.” Tasol Carl Thoresen, em wanpela saveman bilong Yunivesiti Stenfot, long Amerika, em i bin go pas long ol saientis long mekim dispela wok painimaut (Stanford Forgiveness Project), em i tok “i no gat planti man i save tru olsem pasin bilong lusim rong em wanem samting na em i save wok olsem wanem.”
Long ol Kristen, pasin bilong lusim tingting long rong bilong man em i bikpela samting. Wanpela stori long nius The Toronto Star i kamapim insait bilong dispela tok olsem, “yu save man i bin rongim yu, na yu lusim tingting olgeta long bel nogut dispela samting i bin kamapim, na yu mekim gut long em na yu mekim pasin sori na laikim em tu.” Em i narapela kain long pasin bilong orait long rong man i bin mekim, o tingim sampela as na em i bin mekim, o lus tingting, o tok olsem dispela rong i no bin kamap; na em i no makim olsem yu mas pilim olsem narapela i bin rongim yu, nogat. Dispela ripot i tok, bilong lusim tingting tru tru long rong bilong narapela, man i mas “rausim kros na bel nogut olgeta.”
Ol saientis i tok olsem ol i mas kisim sampela save moa long ol samting pasin bilong lusim tingting long rong em inap mekim long skin bilong man. Tasol ol i tok olsem dispela samting em i bin helpim bel na tingting bilong ol man long i stap isi, na tu, em i bin helpim ol na ol “i no tingting planti tumas na bel hevi.”
Wanpela bikpela as na yumi mas lusim tingting long rong man i mekim long yumi, em i stap long Efesus 4:32, em i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” Baibel i tokim yumi olsem, pasin bilong lusim tingting long rong narapela i mekim, em i wankain olsem ol narapela samting yumi mekim—yumi mas bihainim pasin God yet i save mekim.—Efesus 5:1.
Sapos i gat as bilong marimari long narapela tasol yumi no laik lusim tingting long rong em i bin mekim long yumi, orait dispela inap bagarapim pasin bilong yumi long pas gut wantaim God. Jehova i laik bai yumi mas lusim rong bilong ol narapela. Sapos yumi mekim olsem, orait nau yumi ken beten askim em long lusim rong bilong yumi.—Matyu 6:14; Mak 11:25; 1 Jon 4:11.