Gutpela Pasin i Save Litimapim Nem Bilong God
OL MAN i laikim God ol i save strong long kamapim lait bilong spirit em Baibel i as bilong en. Taim ol i mekim olsem, ol i bihainim dispela tok Jisas i bin mekim: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Matyu 5:16) Ol tok bilong yumi na ol stretpela pasin yumi mekim inap litimapim nem bilong God.
Ol Witnes Bilong Jehova i save bihainim ol tok bilong Baibel na ol i save wok strong long helpim ol narapela long samting bilong spirit na long dispela rot ol i laik amamasim God. Ol i save mekim olsem tu long ol kantri em ol gavman i no orait yet long ol long rejistaim wok bilong ol long autim tok. Long biktaun bilong wanpela bilong ol dispela kantri, ol Witnes i bin mekim ol kibung distrik long olgeta yia na 6,000 i go inap 9,000 manmeri i bin bung long ol dispela kibung. Ol i bin rentim ol bikpela haus em ol man i save mekim ol so samting long en bilong mekim ol dispela kibung. Olsem ol i bin mekim long bipo, paslain long ol i laik mekim kibung long 1999, planti handet Witnes i wok strong long klinim dispela haus na ol i putim ol samting bilong saun na planti tausen sia long en.
Planti man i lukim dispela wok ol i mekim bilong redim ples. Ol wokman bilong dispela haus i lukim wok ol brata i mekim. Maski 15,666 i bin bung, ol i lukim olsem olgeta samting i bin wok gut na ol Witnes i bihainim tru gutpela pasin. Ol dispela wokman i amamas long wok ol Witnes i mekim bilong klinim dispela ples bihain long kibung.
Ol bos bilong dispela haus i pilim tru wok ol Witnes i mekim na bilong kamapim bel bilong ol, ol i putim nem bilong ol Witnes i stap paslain long ol narapela long lista bilong rentim dispela haus long yia antap. Tasol ol i mekim sampela samting moa. Long Julai 15, 1999, ol i givim wanpela presen long komiti bilong kibung bilong kamapim olsem ol i pilim tru gutpela wok bilong ol. Ol i givim wanpela hap plang i gat rait long en i tok olsem “kongrigesen bilong ol Witnes Bilong Jehova.” Ol Witnes i no ting bai dispela kain samting i kamap long dispela kantri em gavman i pasim wok bilong ol long skulim ol man long Baibel.
Long olgeta hap bilong graun long yia 2000 na 2001, planti milion manmeri bai i go long planti handet “Ol Man Bilong Bihainim Tok Bilong God” Kibung Distrik bilong ol Witnes Bilong Jehova. Taim yu go long dispela kibung, yu yet inap lukim pasin bilong ol dispela man em ol i wok strong long mekim ol samting Baibel i toktok long en bambai ol gutpela pasin ol i mekim i ken litimapim nem bilong God.