Ripot Long Wok Bilong Kingdom
Ol Man i Laikim Tru Jehova Em i Tingim Ol i Gutpela Samting Tru
KIRAP long taim bilong ol man i bin raitim Baibel, Lebanon i gat nem long planti gutpela kaikai na ol diwai samting i save kamap long graun bilong en. (Song 72:16; Aisaia 60:13) I gat planti diwai sida long dispela hap na planti man i laikim tru dispela diwai bilong wokim ol haus, long wanem, em i gutpela diwai tru, i gat gutpela smel, na em inap i stap longtaim. Long bipo, wanpela samting i gutpela tru i kamap long Lebanon, winim ol dispela diwai sida. Gutnius Mak i raitim i tok olsem long Taia na Saidon, long graun bilong Lebanon long bipo, “ol i harim tok long ol samting Jisas i mekim, na bikpela lain manmeri tru i kam long em.”—Mak 3:8.
Olsem tasol long nau, Lebanon i wok yet long kamapim ol kaikai i gutpela tru long ai bilong Jehova. Ol stori i stap daunbilo i kamapim dispela samting.
• Ol i askim wanpela yangpela Witnes nem bilong em Wissam long mekim wanpela tok long klas bilong em long skul inap 30 minit. Wissam i tingting olsem rot i op bilong em i ken autim tok. Olsem na em i mekim wok long buk Life—How Did It Get Here? By Evolution or by Creation? na em i redim wanpela tok i stori long ol samting i kamap olsem wanem. Tasol taim tisa i lukim stori Wissam i raitim, em i tok dispela stori em i bikpela samting, olsem na Wissam i ken skruim taim bilong em na toktok inap 45 minit.
Wissam i kirap mekim tok, na tisa i katim tok bilong em na em i go askim het-tisa long kam na harim tok. I no longtaim na het-tisa i kam, na Wissam i kirapim gen tok bilong em. Taim het-tisa i harim askim Wissam i kamapim long kirap bilong tok, em i amamas tru na em i tok olsem ol i mas wokim sampela pepa moa i gat dispela stori long en na olgeta sumatin i mas kisim wanpela.
Bihain liklik wanpela tisa i wokabaut i go, na em i lukim ol tisa na sumatin insait long klas-rum bel bilong ol i kirap tru, na em i laik save ol i mekim wanem samting. Taim ol i tokim em long samting i kamap, em i laik save, Wissam i laik kamapim olsem God i bin wokim olgeta samting o em i laik kamapim olsem ol samting i kamap long rot bilong evolusen. Ol i tok, em i laik kamapim olsem God i wokim olgeta samting. Dispela tisa i kisim save olsem Wissam i wanpela Witnes Bilong Jehova, na em i tokim ol sumatin olsem: “Taim yupela skelim tok bilong em, yupela bai luksave olsem tok bilong saiens i helpim dispela tok olsem God i bin wokim olgeta samting, na ol samting i no kamap long rot bilong evolusen.”
Ol i kisim save olsem dispela tisa i gat wanpela buk Creation na em i bin mekim wok long en bilong skulim ol sumatin long yunivesiti! Taim em i laik go, em i askim Wissam olsem i orait long em i ken kisim ol sumatin bilong em i kam long de bihain na bai Wissam i ken toktok long ol o nogat. Dispela i opim rot gen na Wissam i mekim gutpela wok long autim tok bilong Jehova.
• Nina em i gat 22 krismas na em i dai long kisim tok i tru, olsem nek bilong man i drai na em i dai long dring wara. Wanpela taim kasen susa bilong Nina i givim wanpela Baibel long em na em i stori long Nina long lotu Pentikostal. Nina i amamas long kaunim Baibel, na taim em kaunim em i kisim save olsem ol Kristen i mas autim tok, olsem na em i kirap autim tok long ol man em i save long ol. Olgeta man em i toktok wantaim ol i askim em olsem: “Yu wanpela Witnes Bilong Jehova?” Dispela i mekim na em i tingting planti.
Sikspela yia bihain, ol Witnes Bilong Jehova i kam long haus bilong Nina na tokim em long Kingdom bilong God. Pastaim em i laik traim painim sampela popaia long ol tok ol Witnes i skulim ol man long en. Tasol em i kisim save olsem olgeta bekim bilong ol i stret na ol bekim bilong ol i kam long Baibel.
Bihain Nina i lainim sampela samting, olsem nem bilong God em Jehova; na em i lain long ol blesing yumi bai kisim long rot bilong Kingdom; na em i lainim sampela samting moa, na dispela i mekim na em i bilip olsem em i painim pinis tok i tru. Em i dediket long God na em i kisim baptais. Inap 7-pela yia pinis Nina i mekim wok bilong autim tok long olgeta de. Tru tumas, Jehova i save mekim gut long ol man i save laikim em tru.—1 Korin 2:9.