Taim Ol i Pasim Maus i Olsem Ol i Orait Long En
WANPELA buk (Betrayal—German Churches and the Holocaust) i stori long wok bilong ol lotu long taim gavman Natsi i bosim ples, em i tok: “Planti Kristen ol i bin helpim gavman Natsi, na planti ol i no laik tokaut long dispela pasin birua ol Natsi i mekim long ol Juda. Ol i bin pasim maus, na dispela yet i tokaut klia olsem ol i orait long en.”
Wanem samting i mekim na ol man i tok ol i Kristen ol i helpim ol Natsi? Buk i tok, “ol lo Hitler i putim bilong ol manmeri long Jemani na bai ol i ken sindaun gut,” dispela i pulim planti manmeri long bihainim em. Buk i tok: “Em i no laikim ol piksa nogut bilong ol man i stap skin nating o mekim pasin sem, na pasin bilong pamuk nabaut, na pasin bilong rausim bel, na man i slip wantaim man, na ol piksa nogut bilong ol man bilong malenim piksa long nau, na em i givim ol medal bras, silva, na gol long ol meri i karim 4-pela, 6-pela, na 8-pela pikinini, na long dispela rot em i strongim ol meri long i stap long haus na mekim ol wok bilong ol, olsem bipo ol meri i save mekim. Ol kontrak bilong Vesai i bin daunim ol tru, olsem na taim Hitler i putim lo olsem ol manmeri i mas bihainim ol gutpela pasin ol tumbuna bilong ol i bin bihainim bipo, na em i mekim wok long ami bilong litimapim kantri, planti manmeri i pilim olsem dispela gavman i gutpela tru, na planti Kristen long Jemani tu ol i ting olsem.”
Wanpela lain i bin stap narapela kain long dispela taim. Buk Betrayal i tok: “Ol Witnes Bilong Jehova i no laik insait long pait o helpim wok bilong ol ami.” Dispela i mekim na ol Natsi i kirap pait long dispela liklik lain, na ol i kalabusim planti lain bilong ol long ol banis kalabus nogut. Tasol sampela man i tok ol i disaipel bilong Krais ol i no bin tokaut olsem dispela pasin i no stret. Buk i tok moa olsem: “Ol Katolik na ol Talatala i bin birua tru long ol Witnes Bilong Jehova na ol i no sori long ol, na ol i helpim pasin nogut bilong Hitler tasol ol i no helpim pasin bilong ol Witnes olsem ol i no save insait long pait.” Ol dispela lotu i pasim maus na dispela i mekim na ol Natsi i bin mekim nogut tru long ol Witnes.
Ol lotu i bin insait long wok politik bilong ol Natsi, na dispela i mekim na sampela lain i bel nogut tru na tok pait long dispela samting, tasol buk Betrayal i tok long ol Witnes Bilong Jehova olsem ol i “wanpela lain i no laik helpim o wok wantaim gavman Natsi.”