Pasin Kristen Bilong Laikim Narapela—Em i No Tok Nating Tasol
TAIM paia i kukim haus bilong famili Bartholomew long Trinidat, olgeta samting bilong ol i paia olgeta na i lus, tasol ol yet i no bagarap. Wanpela wanblut i stap klostu long ol em i kisim ol i go stap long haus bilong em, na i gat sampela samting moa i kamap.
Olive Bartholomew em i wanpela Witnes Bilong Jehova, na ol lain bilong kongrigesen em i save i go long en na ol kongrigesen i stap long ol ples klostu ol i kirap bungim ol samting na givim bilong wokim gen haus bilong em na famili bilong em. Ol i makim wanpela komiti bilong lukautim wok bilong wokim dispela haus, na ol i kirap mekim wok. Inap olsem 20 Witnes na sampela man i save sindaun long hap bilong ol i kam bilong mekim wok. Ol yangpela tu i helpim dispela wok, na sampela i kam bilong givim kaikai long ol wokman.
Olive i tok: “Famili bilong mi i pilim tru dispela samting. Ol i no Witnes, na man bilong mi i kirap nogut long ol samting em i lukim ol i mekim.” Dispela ripot i stap long nius Sunday Guardian bilong Trinidat.
Man i go pas long dispela wok bilong wokim haus i stori long wok ol i mekim na em i tok, ol kain wok olsem em i mak bilong ol Kristen tru. Em i tok: “Taim mipela i go long haus bilong ol man na toktok long pasin bilong laikim tru ol narapela, mipela i no toktok tasol, nogat. Mipela i save wok strong long bihainim ol tok mipela i autim long ol man.”—Jon 13:34, 35.
[Piksa long pes 32]
Olive Bartholomew wantaim man bilong em