Bel Isi Long Olgeta Hap—Em Bai Kamap Olsem Wanem?
OLSEM WANEM? Klostu nau bel isi bai i kamap long olgeta hap? Long bipo planti man i ting olsem, tasol nau ol i no bilip tumas long dispela. Wanpela nius (Daily Mail & Guardian) bilong Saut Afrika i kamapim wanpela ripot i stori long ol hevi bai kamap long bihain, na i tok: “Inap 10-pela yia i go pinis, ol man i bin tokaut olsem wanpela nupela pasin bai i kamap long olgeta hap, tasol nau ol i no bilip olsem ol dispela gutpela samting bai kamap.”
Ol man bilong raitim dispela stori ol i bin tingim bilip bilong ol man inap 10-pela yia i go pinis, em ol man i bilip olsem gutpela taim i laik kamap. Long dispela taim pasin birua namel long Amerika na Rasia i pinis, na ol dispela strongpela kantri i no tingting moa long pait. Ol man i ting nupela taim i laik kamap, na planti ol i ting olsem ol man bai kirap mekim ol bikpela wok samting bilong daunim hevi bilong i stap rabis, na sik, na pasin bilong bagarapim bus na graun. Dispela ripot i tok: “Ol dispela tok ol man yet i mekim long ol samting i mas kamap bihain ol i olsem ol tok nating. Ol nupela pait i kirap long planti hap em yumi no save tumas long en; na pasin bilong i stap rabis i wok long i go bikpela long olgeta hap. Tupela kantri moa i holim ol bom nuklia. Gutnem bilong Yunaitet Nesen i bagarap, long wanem, ol i no mekim stretpela pasin tumas bilong stretim ol hevi bilong ol man. Ol manmeri i senisim tingting bilong ol—ol i no tingting moa olsem gutpela taim bai kamap, nogat; nau ol i tingting olsem taim nogut i laik kamap.”
Ol sumatin bilong Baibel i luksave olsem wok bilong ol man, maski em i olsem gutpela wok, em bai i no inap tru long kamapim gutpela sindaun. Bilong wanem? Long wanem, olsem Baibel i tok: “Dispela graun olgeta em i stap aninit long strong bilong Satan.” (1 Jon 5:19) Tru tumas, dispela graun i stap aninit long strong bilong Satan, olsem na em i no inap kamap wanpela paradais olsem God i laik taim em i wokim.
Tasol i gat as na yumi ken ting olsem ol gutpela samting bai kamap. God Jehova i tok promis long kamapim bel isi long olgeta hap bilong graun, na em i no inap mekim olsem long rot bilong stretim stretim ol samting nogut bilong dispela graun na nau Paradais bai kamap, nogat; em bai kamapim “nupela graun” em “stretpela pasin tasol bai i stap long en.” (2 Pita 3:13) Tru tumas, long rot bilong Kingdom bilong God, dispela graun bai kamap wanpela gutpela ples em bel isi i stap long en, na sindaun bilong ol manmeri i bihainim tok bai gutpela tasol inap olgeta taim bihain na ol bai amamas long wok ol i mekim. Na tu, God i tok promis long “mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” Ol dispela tok promis i no kamap long ol tok bilong ol man. Nogat. Ol i kamap long tok bilong Man bilong wokim yumi, em dispela Man i no save giaman.—KTH 21:4; Taitus 1:2.