Yu Ting Klostu Nau Ol Lotu Bai Stap Wanbel?

Yu Ting Klostu Nau Ol Lotu Bai Stap Wanbel?

Christian Krause, em presiden bilong wanpela lain lotu (Lutheran World Federation), em i tok: “Yumi lukim wanpela bikpela samting i kamap long ol lotu bilong yumi.” Na Pop John Paul Namba Tu i tok long “wanpela bikpela samting i kamap long wok bilong kamapim gen pasin wanbel namel long ol Kristen.”

Ol i mekim ol dispela tok taim ol i sainim wanpela pepa (Official Common Statement) long Oktoba 31, 1999, long Oksbek, Jemani, na dispela i strongim wanpela tokaut (Joint Declaration on the Doctrine of Justification) bilong ol lotu. Ol i bin makim gut de na ples bilong mekim dispela samting. Ol i tok long Oktoba 31, 1517, Martin Luter i pasim 95 tokaut long dua bilong haus lotu long Witenbek, na dispela i kirapim sampela long bruk long misin Katolik na lotu Talatala i kamap. Long 1530 ol Luteran i kamapim ol as bilip bilong ol (Augsburg Confession) na Misin Katolik i sakim, na dispela i mekim na lotu Talatala na Misin Katolik i bruk.

Yu ting dispela tokaut ol i mekim (Joint Declaration) bai opim rot long stretim dispela pasin bilong misin long stap bruk bruk, olsem ol i tok? Sampela bilong ol i no ting dispela samting bai kamap. Winim 250 tisa bilong lotu Talatala ol i sainim wanpela pepa i gat tok lukaut olsem lotu Talatala i mas was gut nogut Misin Katolik bai daunim ol. Na tu, ol Talatala i no amamas taim Misin Katolik i tokaut long wanpela bikpela samting ol i laik mekim long yia 2000, em wankain samting tasol ol i bin mekim inap 500 yia i go pinis na ol i bruk bruk. Tasol i hatwok long ol i kamap wanbel gen, long wanem, tokaut bilong ol Talatala (Augsburg Confession) na tokaut bilong Misin Katolik bilong bekim dispela tok, em ol i kamapim long Kibung Bilong Trent, i stap yet.

Ol lotu i gat nem Kristen ol i bruk bruk na i no i stap wanbel liklik na dispela em i wanpela bikpela hevi tru long ol, olsem na pasin bilong bung wantaim long sainim wanpela tokaut i no inap long stretim dispela hevi. Na tu, bilong i stap wanbel long bilip, tok bilong God long Baibel i mas stap olsem as bilong ol bilip bilong yumi. (Efesus 4:3-6) Pasin bilong i stap wanbel tru long bilip i save kamap long rot bilong kisim save na mekim ol samting God i laik yumi mas mekim. Dispela pasin wanbel i no inap kamap long rot bilong tok orait long bilip bilong narapela lain maski yu no wanbel tru long bilip bilong ol. Gutpela profet Maika i tok: “Maski olgeta arapela lain pipel i lotu long ol giaman god bilong ol yet na bihainim ol, bai yumi Israel i lotu long God, Bikpela bilong yumi oltaim oltaim, na bihainim em wanpela tasol.”—⁠Maika 4:⁠5.

[Piksa Kredit Lain long pes 32]