“Wanpela Samting Olgeta Manmeri i Mas Amamas Long En”
TUVALU, wanpela naispela kantri long Saut Pasifik i gat 9-pela ailan, em i gat samting olsem 10,500 manmeri i stap long en. Tasol maski ol i no planti, ol Witnes Bilong Jehova long Tuvalu ol i luksave olsem God i gat laik long “kisim bek olgeta manmeri, bai ol i ken save long as bilong tok tru,” olsem na ol i gat laik tru long kisim ol buk na nius bilong Baibel long tok ples bilong ol yet. (1 Timoti 2:4) Dispela i hatwok, long wanem, i no gat wanpela dikseneri long dispela tok ples. Long 1979, wanpela misineri bilong ol Witnes Bilong Jehova em i mekim wok long Tuvalu, em i kirapim dispela bikpela wok. Dispela misineri wantaim meri bilong em, tupela i sindaun wantaim wanpela famili long Tuvalu na i lainim tok Tuvalu, na isi isi dispela misineri i wokim wanpela lista bilong ol tok long tok ples Tuvalu. Long 1984, Sosaiti Wastaua Bilong Nu Yok i wokim buk Yu Inap i Stap Oltaim Long Paradais Long Graun long tok Tuvalu.
Dokta T. Puapua, em wanpela praim-minista bilong Tuvalu long bipo, em i raitim wanpela pas bilong tok amamas long dispela buk Stap Oltaim. Em i tok: “Dispela buk em i wanpela bikpela samting tru long ol manmeri bilong Tuvalu. Yupela i ken amamas tru long wok yupela i bin mekim—em wanpela gutpela wok tru bilong kirapim ol manmeri bilong dispela kantri long tingim ol samting bilong spirit. Mi bilip olsem dispela wok bai stap olsem wanpela bikpela samting tru i bin kamap long Tuvalu long wok bilong prinim ol buk bilong skulim ol man. . . . Dispela [bikpela wok] em wanpela samting olgeta manmeri i mas amamas long en.”
Lista bilong ol planti tok dispela misineri i bin bungim i kirapim wok bilong kamapim wanpela dikseneri long tok Tuvalu na tok Inglis long 1993. Dispela em namba wan dikseneri long tok Tuvalu em olgeta manmeri inap mekim wok long en. I no longtaim i go pinis na wanpela lain (National Language Board of Tuvalu) i kisim tok orait bilong mekim wok long dispela dikseneri bilong kamapim narapela kain dikseneri i kamapim gut tok Tuvalu, em i namba wan dikseneri olsem.
Kirap long Janueri 1, 1989, na i kam inap long nau, ol i bin wokim nius Wastaua wanpela taim long wan wan mun long tok Tuvalu. Sapos yu wok long kaunim dispela nius long namba tu tok ples bilong yu, yu ken skelim pes 2 bilong dispela nius na lukim olsem namba wan tok ples bilong yu i stap insait long ol tok ples em ol i save wokim nius Wastaua long en, o nogat. Bai yu kisim bikpela amamas moa long kaunim dispela nius long tok ples bilong yu yet.