Bel Isi Long Nupela Milenium?
LONG Septemba 14, 1999, long Paris na Nu Yok Siti ol i bin kirapim Intenesenel Yia Bilong Kamapim Bel Isi. Jeneral Asembli Bilong Yunaitet Nesen i tokaut long dispela samting bilong yia 2000. Federico Mayor, bipo em i dairekta jeneral bilong UNESCO, i askim ol kantri “long kamapim wanpela pasin long olgeta hap bilong kirapim pasin bilong bel isi na no ken pait.”
UNESCO i gat wanpela tok i kain olsem lo bilong ol na i tok, “ol pait i save kirap pastaim long tingting bilong ol man, olsem na pastaim yumi mas putim pasin bilong bel isi long tingting bilong man yet na i kamap olsem strongpela banis bilong sakim pait.” Bilong bihainim dispela tok, dispela oganaisesen bai kirapim pasin bilong bel isi long rot bilong “skulim, na toktok wantaim na wok wantaim” ol man. Mista Mayor i tok: “Maski ol man i stap isi na i nolaik tru long pasin bilong pait, dispela tasol i no inap—ol i mas wok long kamapim bel isi namel long ol man.”
Tasol sori tru, yia 2000 i gat planti pait, bel isi nogat. Ol samting i bin kamap long taim bilong yumi—na ol samting bilong yia 2000 tu—i kamapim long ples klia olsem ol man i no inap pasim ol pait na pasin bilong pait, maski ol i gat laik long mekim olsem.
Tasol i stret long tok olsem bel isi na pasin bilong kisim skul i poroman wantaim. Winim 2,700 yia i go pinis, profet Aisaia i tok profet olsem: “Bai mi yet mi skulim ol pikinini bilong yu, na bai ol i gat gutpela sindaun tru.” (Aisaia 54:13) Aisaia i bin luksave long wanpela taim bihain na ol manmeri bilong olgeta kantri bai kam long lotu tru bilong God Jehova bambai ol i ken skul long ol pasin bilong em. Na dispela bai mekim wanem? “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Aisaia 2:2-4) Long pasin i stret wantaim dispela tok profet, ol Witnes Bilong Jehova ol i save skulim ol man long olgeta hap, na dispela skul i helpim pinis planti milion manmeri long lusim pasin bilong bel nogut long ol man bilong narapela kantri o skin, em dispela pasin i as bilong planti pait.
Ol pait bai pinis taim Kingdom bilong God i bosim graun, na em bai kamapim taim bilong bel isi na gutaim i no inap pinis long graun. (Song 72:7; Daniel 2:44) Long dispela taim, tok bilong man bilong raitim Song bai kamap tru, olsem: “Lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun.”—Song 46:8, 9.