Ol i Bin Sakim Pasin Bilong Ol Wanlain i Strong Long Pulim Ol
LAIK long mekim ol samting na bai ol wanlain i amamas long ol, dispela i save mekim na planti man i bihainim tingting na pasin bilong ol wanlain. Ol yangpela i mas strong moa yet long tok nogat long ol pasin i save nogutim man, olsem pasin bilong kisim drak na pasin pamuk. Olsem wanem ol inap sakim ol wanlain i strong long pulim ol?
I no longtaim i go pinis na tupela yangpela meri long Polan i tok: “Tingting bilong dispela graun i save kamap ples klia tru namel long planti wanlain bilong mipela. Ol i save giaman long taim bilong tes, mekim ol tok doti, na ol i save pasim ol klos i narapela kain na i no gutpela, na ol i save harim ol musik nogut. Mipela i amamas tru long yumi gat ol buk samting i stori long hevi bilong ol yangpela na i lukautim mipela na mipela inap sakim pasin bilong ol yangpela i laik pulim mipela, olsem ol i save bel nogut long ol samting na ol i save bikhet!
“Mipela i laik tok tenkyu tru long ol stori bilong Wastaua i helpim mipela long save olsem ol narapela i save tingim na laikim mipela ol yangpela. Ol tok bilong Baibel mipela i kisim bilong helpim mipela em i soim gut rot long mipela na mipela i wok yet long mekim ol samting God Jehova i laikim. Mipela i bilip tru olsem taim mipela i stap gut long wok bilong Jehova dispela em i gutpela rot tru long bihainim long i stap bilong mipela.”
Em nau, ol yangpela manmeri inap sanap strong na sakim pasin bilong ol wanlain i strong long pulim ol. Taim ol yangpela Kristen i lainim tingting bilong ol, ol inap lain long bihainim gutpela tingting long ol samting ol i mekim na ol i no bihainim tingting bilong dispela graun, nogat, ol bai bihainim tingting bilong God.—Hibru 5:14; 1 Korin 2:12.