Yu Ting Lotu Bai Kamapim Bel Isi Long Olgeta Hap?
KIRAP long Ogas 28 i go inap Ogas 31, 2000, winim 500 man bilong 73 kantri ol i go long biktaun Nu Yok. Ol i bung wantaim long Yunaitet Nesen bilong holim wanpela bikpela bung (The Millenium World Peace Summit of Religious and Spiritual Leaders). Ol dispela bikman—planti i pasim longpela laplap i raunim het olsem bilas, na ol klos em kala bilong en i orens, ol bilas bilong het ol i wokim long gras bilong pisin, o ol longpela blakpela klos—ol i hetman bilong planti lotu. Sampela bilong ol i bilong lotu Bahai, Buda, Hindu, Islam, Jain, Juda, Sik, Sinto, Soroastrian, Tau, na ol lotu i holim nating nem Kristen.
Ol dispela bikman i bung long Yunaitet Nesen long tupela de bilong dispela 4-pela de bung. Tasol Yunaitet Nesen i no stretim dispela bung o givim mani long ol, nogat; ol narapela oganaisesen i mekim. Tasol ol bikman bilong Yunaitet Nesen na ol bikman bilong ol lotu ol i toktok olsem em i bikpela samting long ol i mas wok gut wantaim bilong pinisim hevi bilong i stap rabis, pasin birua namel long ol narapela narapela lain, ol hevi bilong graun na win na wara i laik bagarap, pait, na ol samting bilong pait em inap bagarapim bikpela lain manmeri long wanpela taim.
Ol dispela bikman i sainim wanpela pepa i gat het-tok olsem, “Wok Strong Long Kamapim Bel Isi Long Olgeta Hap.” Dispela pepa i tokaut olsem ‘sampela taim ol pait i save kamap long nem bilong lotu,’ na pepa i tok moa olsem ol man i sainim dispela pepa ol bai “wok wantaim Yunaitet Nesen . . . long kamapim bel isi.” Tasol ol i no mekim sampela tokaut long pasin bilong kamapim bel isi.
Long namba tu de, Bawa Jain, em seketeri-jeneral bilong dispela bung, em i stori olsem sampela yia paslain liklik em i lukim wanpela piksa ol man i bin wokim na i stap long Yunaitet Nesen. Dispela piksa i soim wanpela man i longpela tru, winim haus bilong Yunaitet Nesen Sekreteriat. Man hia i wok long paitim dispela haus olsem em i paitim wanpela dua. Aninit long dispela piksa i gat dispela tok: “King Bilong Kamapim Bel Isi.” Mista Jain i tok: ‘Taim mi lukim dispela piksa, bel bilong mi i kirap tru. Mi askim sampela man long insait bilong dispela piksa. Ating nau mi save long bekim bilong dispela askim. Dispela bung bilong yupela olgeta bikman bilong ol samting bilong spirit na ol lotu i kamapim long mi olsem yupela i makim dispela king bilong kamapim bel isi em i wok long paitim dua bilong Yunaitet Nesen.’
Baibel i kamapim narapela tok, olsem King Bilong Kamapim Bel Isi em Jisas Krais. Em bai kamapim bel isi long olgeta hap na i no long rot bilong ol bikman bilong politik bilong graun o ol bikman bilong lotu, tasol long rot bilong Kingdom Bilong God. Dispela Kingdom—gavman bilong God long heven—em tasol bai mekim na ol manmeri i bihainim tok ol bai stap wanbel, na em bai kamapim laik bilong God long graun.—Aisaia 9:6; Matyu 6:9, 10.