Stadi Long Baibel—Dispela Inap Helpim Yu?

“YU NO ken ritim dispela buk sapos pris i no stap wantaim yu.” Dispela tok i stap long kirap bilong sampela Baibel bilong Misin Katolik. Kay Murdy bilong Catholic Bible Institute long Los Enjeles, i tok: “Mipela ol Katolik i no bin lain long ol tok bilong Baibel, tasol dispela samting i wok long senis nau.” Dispela meri i tok, taim ol Katolik i luksave long olsem wanem Baibel inap helpim sindaun bilong ol, “ol yet i hangre tru long save long tok bilong Baibel.”

Nius U.S. Catholic i stori long dispela senis na i kamapim tok bilong wanpela kodineta i stretim ol klas bilong lotu, na em i tok ol Katolik i insait long ol klas bilong stadi long Baibel, ol i pilim olsem “ol Katolik i bin lus long sampela gutpela samting, na Baibel i gat planti samting bilong spirit long en. Ol i laik kisim sampela bilong ol dispela gutpela samting em bipo ol i no bin kisim.”

Man i stadi long Baibel em inap kisim wanem ol “gutpela” samting? Tingim dispela: Yu laik save long olsem wanem yu inap karim ol hevi bilong olgeta de? Olsem wanem bel isi i ken stap long famili? Bilong wanem planti man i no bihainim gutpela pasin na ol i bagarapim sindaun bilong ol narapela? Wanem samting i kirapim ol yangpela long pait na bagarapim man long nau? Tok Bilong God, em Baibel, i bekim gut ol dispela na ol narapela askim ol man i hatwok long save long bekim bilong ol. Ol dispela bekim i “gutpela” samting tru long ol Katolik na Talatala, na tu, long ol Buda, Hindu, Muslim, Sinto, na long ol man i no bilip long God na ol man i tok yumi no inap save long God. Olsem man bilong raitim Song i tok: ‘Tok bilong God i olsem lam bilong helpim man long wokabaut stret, na i olsem lam bilong soim rot long em.’ Baibel inap mekim wankain samting long yu tu.​—⁠Song 119:105.