“Tru God i Save Kukim Ol Man Long Bikpaia Bilong Strafim Ol?”
“Yupela i skul long tok bilong lotu?”
Joel na Carl i kirap nogut long dispela askim. Dispela tupela yangpela man i save wok long namba wan ofis bilong ol Witnes Bilong Jehova long Brooklyn, New York—ol i wok long lukluk long ol buk long wanpela buk stua i stap klostu. Taim Joel i wok long lukluk long ol buk concordance bilong Baibel, Carl i stori long em long toktok em i bin mekim wantaim wanpela man long taim bilong autim tok. Wanpela man i sanap klostu i harim tok ol i mekim na dispela i kirapim em long givim dispela askim long ol.
Dispela man i gat askim long wanpela samting em i laik save long en, na i no olsem em i laik save tasol olsem dispela tupela yangpela man hia i skul long tok bilong lotu o nogat. Em i tok: “Mi wanpela Juda, na sampela pren Kristen i bin tokim mi olsem God bai kukim mi long bikpaia, long wanem, ol Juda i bin sakim Jisas. Dispela i save mekim na mi pret. I no stret wanpela God i save laikim tru ol man em inap givim kain strafe olsem long ol man. Tru God i save kukim ol man long bikpaia bilong strafim ol?”
Joel na Carl i tokim dispela man olsem ol i sumatin bilong Baibel. Ol i soim em hap bilong Baibel i tok olsem ol man i dai pinis ol i no save long wanpela samting, ol i dai tru na ol i wetim kirap bek. Olsem na ol i no kisim bikpela pen o pen oltaim long bikpaia, olsem hel. (Song 146:3, 4; Saveman 9:5, 10; Daniel 12:13; Jon 11:11-14, 23-26) Ol i toktok inap 45 minit, na bihain dispela man i givim nem na atres bilong em long tupela na em i askim ol long givim sampela save moa long em.
Sapos hel em ples i gat paia long en, yu ting ol man inap askim God long salim ol i go long dispela hap? Tasol Jop i laik ranawe long ol hevi bilong em, na em i mekim dispela askim: “Plis, haitim mi long hel inap long taim kros bilong yu i pinis; na yu ken makim wanpela taim na bai yu tingim mi.” (Jop 14:13, Douay Version) Yumi save, Jop i no bilip olsem hel em i wanpela ples bilong kisim pen oltaim long en. Tasol em i laik i go long dispela ples na hait long ol hevi i painim em. Taim man i dai em i no stap moa, na dispela hel Baibel i toktok long en em i makim matmat tasol.
Sapos yu laik save moa long ol samting i save painim yumi taim yumi dai na wanem samting bai painim yumi long bihain, orait mipela i laik kirapim yu long mekim dispela samting mipela kolim daunbilo.