I Stap Longpela Taim Moa Winim Gol
PLANTI man i laikim tru gol, long wanem, em i naispela samting tru na em inap long i stap longpela taim. Gol i save lait na em i ken stap longpela taim na i no inap long bagarap kwik, olsem na long dispela as planti man i save laikim tru gol. Em i no inap bagarap long wara, o win oksijen, o marasin salfa o long planti narapela samting. Maski planti handet yia i bin lus pinis, planti gol samting ol i painim long ol sip i kapsait long solwara na long ol narapela hap, ol i stap gut yet na strongpela lait bilong ol i stap.
Tasol i gat wanpela samting i save stap longpela taim moa, olsem Baibel i tok: “Gol em i gutpela samting tru, tasol ol i save kukim long paia, bilong traim na painimaut em i gol tru, o nogat. Bilip bilong yupela i winim gol na i gutpela moa, long wanem, gol em i samting bilong bagarap.” (1 Pita 1:7) Gol ol i bin ‘traim na painimaut olsem em i gol tru’ o ol i klinim long rot bilong kukim long paia o long ol narapela rot, dispela gol em i 99.9 pesen gol stret. Tasol maski em i gol tru, em inap long bagarap na pinis olgeta sapos ol i putim insait long wanpela kain strongpela marasin i gat tripela hap haidroklorik asit na wanpela hap naitrik asit long en. Olsem na Baibel i tok stret olsem, long samting bilong saiens “gol em i samting bilong bagarap.”
Tasol bilip Kristen tru i save helpim man long “kisim laip.” (Hibru 10:39) Ol man inap long kilim i dai wanpela man i gat strongpela bilip wankain olsem ol i bin kilim i dai Krais Jisas. Tasol God i tok promis olsem long ol man i gat trupela bilip: “Yu mas holim bilip, i go inap long taim yu dai, na bai mi givim yu laip olsem prais.” (KTH 2:10) God i tingim ol man i stap gut long em na ol i dai, na em bai kirapim ol bek long matmat. (Jon 5:28, 29) Tasol gol i no inap tru long mekim olsem. Olsem na dispela i kamapim klia olsem bilip i bikpela samting moa winim gol. Tasol bilong bilip i ken helpim yu, i mas i gat samting bilong traim na painimaut olsem em i strongpela bilip o nogat. Pita i tok olsem bilip i winim ol “traim” i gutpela samting moa winim gol. Ol Witnes Bilong Jehova bai amamas long helpim yu long stadi long Baibel bambai yu inap bilip long trupela God, em Jehova, na pikinini bilong em, Krais Jisas, na bilip bilong yu inap kamap strong. Olsem Jisas i tok, dispela bai helpim man long kisim “laip bilong i stap gut oltaim.”—Jon 17:3.