Setifiket Bilong Makim Wok i Nambawan Tru

LAIN AJOCAD (Association of Congolese and African Journalists for the Development) long Ripablik Demokratik Bilong Kongo i save givim dispela setifiket “bilong tok amamas long ol man, o ol oganaisesen samting, em ol i mekim wok bilong helpim sindaun bilong ol man long [Kongo].”

Long Novemba 17, 2000, ol i givim dispela Setifiket Bilong Makim Wok i Nambawan Tru long ol Witnes Bilong Jehova long “wok ol i mekim bilong helpim ol man long Kongo [long rot] bilong ol gutpela tok i stap long ol buk na nius bilong ol.”

Wanpela nius bilong Kinshasa, em Le Phare, i stori long dispela prais na i tok: “Yu no inap painim wanpela man long Kongo em i no bin ritim nius Wastaua na Kirap! o ol narapela buk na nius bilong ol Witnes Bilong Jehova. Ol dispela nius i stori long kain kain samting long i stap bilong man.” Nius Le Phare i tok tu olsem ol dispela buk na nius i soim “rot bilong karim ol hevi bilong nau” na i kamapim klia “as bilong ol samting nau i kamap long graun.” Nius Kirap! i “no helpim wanpela lain politik, o litimapim ol man bilong wanpela kain skin na daunim ol narapela.” Na tu, ol dispela nius i save kirapim man long “bilip tru long tok promis bilong God long kamapim gutaim na bel isi, em ol dispela gutpela pasin bai senisim dispela pasin nogut bilong nau.”

Olsem lain AJOCAD i tok, ol buk na nius bilong ol Witnes Bilong Jehova i bin helpim tru planti man long Kongo. Ol Witnes i save kamapim ol buk na nius long planti handet tok ples, olsem na ol gutpela tok bilong ol dispela buk na nius inap helpim yu tu.

Plis lukim ol tok i stap daunbilo bilong save olsem wanem yu inap kisim ol dispela nius.